Міжнародны этнамузычны лагер завяршыўся ў Браславе (ФОТА)

Цэлых шэсць дзён музыканты з Беларусі, Літвы і Латвіі абменьваліся вопытам, развучвалі народныя мелодыі, каб потым зладзіць грандыёзны агульны канцэрт на сцэне Дома культуры, паведамляе партал braslav-star.by. Край.бай анансаваў гэтую падзею.

У класах займаліся прафесійныя выканаўцы і аматары, а таксама тыя, хто ўвогуле ніколі не граў на музычных інструментах. Але ўсяго за некалькі дзён удзельнікі лагера развучылі шмат народных песень, авалодалі новымі тэхнікамі ігры на гармоніку, дудзе, скрыпцы, гуслях, мандаліне.

На турбазе, дзе жылі госці лагера, было праведзена некалькі творчых вечароў, удзельнікі глядзелі і абмяркоўвалі дакументальныя фільмы пра славутых народных музыкантаў, расказвалі пра асаблівасці збору фальклору ў сваіх краінах. Таксама госці пабывалі ў міні-экспедыцыях па Друі і Відзах, выступілі на адкрыцці выставы ў Музеі традыцыйнай культуры і нават сталі героямі дакументальнага фільма, які ў гэты ж час здымалі ў Браславе карэйскія тэлежурналісты.

У нядзелю браслаўчане трапілі ў атмасферу ўзаемапранікнення трох нацыянальных культур. На сцэне гралі і танцавалі «Лявоніху», «Cukus drikus», «Гармошачку», «Кадрыль», «Кракавяк». Акрамя традыцыйных твораў, у прыватнасці, латышскімі музыкантамі былі выкананы пост-фальклорныя кампазіцыі, дзе было выкарыстана шмат разнастайных інструментаў – цытра, джамба, конклес, акустычная бас-гітара, скрыпкі і бубны.

Па выніках лагера кожны ўдзельнік атрымаў пасведчанне. Рыхтуецца таксама да выдання дыск з усімі музычнымі творамі, што прагучалі на заключным канцэрце музыкантаў трох краін.