У Смаргонскім раёне гаспадар Залескай сядзібы Міхал Агінскі сустракаў гасцей свята ля ўваходу ў маёнтак (ФОТА)
Тысячы наведвальнікаў сабраў 16 жніўня ў адноўленай Залескай сядзібе Агінскага традыцыйны фестываль-кірмаш “Залессе запрашае сяброў”.
Сёлета гасцей запрашалі “На дажынкі да Міхала”, піша “Гродзенская праўда”. Партал Край.бай анансаваў мерапрыемства.
Пачалося свята з шэсця жней вакольных вёсак з сярпамі. Ля галоўнага ўваходу ў маёнтак сустракаў іх гаспадар Міхал Клеафас Агінскі.
Уздоўж ліпавай алеі расцягнуўся "Горад майстроў". Найбольш пакупнікоў цікавілі рэчы з выявамі Залесся: сувеніры, вырабленыя ў школьнай бізнес-кампаніі, мясцовымі рамеснікамі і майстрамі з Дома рамёстваў, разабралі ў адзін момант. Госці аглядалі падворкі, якія, як і ў мінулыя гады, прадставілі мясцовыя вёскі, вуліцы Залесся і ўстановы сельсавета.
Прайшоў на сёлетнім свяце і раённы конкурс “Уладар сяла”. Маладыя гаспадары запрагалі каня, секлі і пілавалі дровы і нават успомнілі даўно забытае – насілі ваду на каромысле. На гэты раз перамагла сям’я Алены і Дзмітрыя Місураў з СВК “Ракаўцы”.
– Фэст-кірмаш “Залессе запрашае сяброў” традыцыйны, – падсумавала вынікі свята старшыня мясцовага дабрачыннага фонду “Паўночныя Афіны Міхала Клеафаса Агінскага” Ала Шыцікава. – Пачыналі праводзіць фэсты ў рамках грамадскай ініцыятывы. Ужо трэці год арганізатарам з’яўляецца разам з нашым фондам і Смаргонскі райвыканкам.
Паводле “Гродзенскай праўды”
Читайте также
