Сем скульптур з камянёў упрыгожылі Маладзечна (фота)

На ўрачыстай прэзентацыі прысутнічала кіраўніцтва раёна, самі творцы, музыкі, а таксама жыхары і госці горада.

З прывітальным словам да прысутных звярнуўся старшыня Маладзечанскага райвыканкама Аляксандр Яхнавец, які падзякаваў стваральнікам скульптурных кампазіцый і адзначыў, што “такія мерапрыемствы, а таксама такія пленэры, якія мы сёння закрываем, стануць добрай традыцыяй. Парк скульптур будзе пастаянна папаўняцца”.

Старшыня Маладзечанскага райвыканкама Аляксандр Яхнавец

Мерапрыемства было праведзена з падказкі вядомага скульптара, народнага мастака Беларусі Івана Міско. З прапановай правесці плэнэр ён звярнуўся да дырэктара Палаца культуры г. Маладзечна Святланы Сарокі некалькі гадоў назад. І менавіта ў Год культуры дадзеная задума ажыццявілася.

Над сваімі творамі з маладзечанскіх валуноў скульптары з Беларусі і Расіі працавалі на працягу жніўня. Некаторыя з іх ужо маюць свае працы ў горадзе. Гэта бронзавая скульптура «Пасажыркі» Вадзіма Мацкевіча, барэльеф ў фае гасцініцы “Маладзечна”, аўтарам якога стаў Спартак Аруцюнян, мемарыяльны комплекс «Шталаг-342», у стварэнні якога прымаў удзел Валянцін Борзды.

Сем розных скульптур пад агульнай назвай “Мелодыя камянёў” упрыгожылі наш горад. Імі можна любавацца ў любое надвор’е. А работу “Жалейкі”, як адзначыў аўтар Валянцін Борзды, наогул лепш за ўсё глядзець пад парасонам, бо менавіта падчас дажджу з’явіцца магчымасць пабачыць невялікі фантан.

Скульптар Валянцін Борзды дэманструе сваю работу

А скульптура Ігара Засімовіча “Блюз” парадуе тых, хто любіць гуляць увечары, бо толькі ў гэты час можна ўбачыць падсвечванне.

Падчас пленэру кожны творца асабіста здымаў чырвоную стужку і каментаваў сваю работу.

Вадзім Мацкевіч

Аўтар скульптуры – Сяргей Ермаловіч

Ля працы Аляксандра Шомава «Антычная рэпліка» разгарнулася дыскусія наконт таго, якое імя атрымае дзяўчына з арфай. Дырэктар Палаца Святлана Сарока выказала меркаванне, што магчыма скульптура атрымае назву “Мадонна Маладзечна”.

Скульптар Аляксандр Шомаў са сваёй работй «Антычная рэпліка»

Расійскі скульптар Юрый Кандрашоў, аўтар кампазііцыі “Валынка”, у сваім выступленні падзякаваў Рыгору Сароку і маладзечанскаму дудару Сяргею Яруку, які ўдзельнічаў у імпрэзе, за кансультацыйную дапамогу.

Дырэктар музычнага каледжа імя М.-К. Агінскага Рыгор Сарока адзначыў, што “камяні, калі да іх прыкладзены таленавітыя рукі майстроў, могуць не толькі гаварыць, але і спяваць".

Дырэктар музычнага каледжа імя М.-К. Агінскага Рыгор Сарока

Валянцін Борзды ў заключным слове выказаў задавальненне плэнерам: “Сабраліся людзі, камяні, нагода, надвор’е. Нам было добра і ўтульна тут”. А таксама задаволены скульптар, які, дарэчы, родам з Маладзечна, што яго праца “Жалейка” глядзіць на вокны біблятэкі, а “бібліятэка – гэта акно ў свет”.

Падчас закрыцця пленэру “Вернісаж камянёў” скульптарам уручылі дыпломы і статуэткі.

Народны мастак Беларусі Іван Міско

Дана ЗАКРЭЎСКАЯ
Фота аўтара