Адшукваюцца знаўцы даўняй гульні "Шаўцы" (ФОТА)
Гульня праводзіцца пад музыку любога вальса. Хлопцы становяцца на адно калена ў кола, адзін з іх - майстар, астатнія - падмайстры.
У рэдакцыю Kraj.by зноў звярнуўся Зміцер Сідаровіч, краязнаўца, музыка, лідэр і стваральнік беларускага этна-рок-гурта "Камелот". Нагадаем, што раней ён шукаў мелодыю да песні з-пад Крывічоў Мядзельскага раёна, у выніку чаго высветлілася правільная назва вёскі і прозвішча сваякоў жанчыны, ад якой быў запісаны тэкст фалькларыстамі ў 1945 годзе.
Цяпер Зміцер шукае тых, хто іграў у дзяцінстве ў гульню "Шаўцы". Магчыма, яна была распаўсюджаная ў маладзечанска-вілейскім рэгіёне. Цяпер гэтая гульня ўзнаўляецца, у яе гуляюць сучаснікі, і да свайго апісання гульні музыка далучыў сучасны фотаздымак.
"На здымку - нямецкі варыянт гульні “Шаўцы”, цікавай для нас тым, што яна грунтуецца не на “сялянскім”, а на ярка выражаным “местачкова-рамесніцкім” падмурку, - напісаў у сваім лісце Зміцер. - Гульня праводзіцца пад музыку любога вальса. Хлопцы становяцца на адно калена ў кола, адзін з іх - майстар, астатнія - падмайстры. Майстар імітуе рухі шавецкай прафесіі, падмайстры паўтараюць гэтыя рухі за майстрам. Дзяўчаты, якіх на адну меней, чым хлопцаў, у гэты час кружацца ў вальсе вакол майстра і падмайстраў. У нечаканы момант майстар б’е кулаком па зямлі, хлопцы ўскокваюць, хапаюць дзяўчат і танцуюць з імі. Той, каму не хапіла дзяўчыны, становіцца майстрам і, не даючы бавіць час, камандуе хлопцам зноў працаваць. Усё паўтараецца зноў.
Апісанне і фотаздымак гульні прыводзяцца як адпраўная кропка для разваг і летніх краязнаўчых пошукаў. Пытанне краязнаўцам такое. Вядома, што нейкая гульня з назвай “Шаўцы” бытавала ў вілейска-маладзечанскім рэгіёне. Ці рэальна знайсці сталага чалавека, хто б памятаў мясцовы, местачкова-рамесніцкі або іншы, варыянт гульні “Шаўцы”? Дзякуй".
Вольга РУДНІЦКАЯ са слоў Зміцера СІДАРОВІЧА
Читайте также
