Фінал праекта «Па кніжным свеце» сярод маладзечанскіх школьнікаў адбудзецца 4 лютага

4 лютага ў канферэнц-зале Цэнтральнай раённай бібліятэкі імя М. Багдановіча адбудзецца фінал праекта «Па кніжным свеце». На працягу другой паловы 2013 года маладзечанскія школьнікі сустракаліся ў прамежкавых гульнях і дэманстравалі веданне літаратуры, гісторыі і краязнаўства ў межах школьнай праграмы. Так, у кастрычніку мінулага года прайшла адна з такіх інтэлектуальных гульняў.

Пра тое, вучні якіх навучальных устаноў сустрэнуцца ў фінале, Край.бай распавяла загадчыца аддзела абслугоўвання і інфармацыі бібліятэкі Таццяна Закрэўская.

– У фінал трапілі пяць каманд, – патлумачыла яна. – Высвятляць, хто стане лепшым, будуць вучні гімназіі-каледжа мастацтваў, гімназіі №7 і сярэдніх школ №5, 9 і 12.

Як адзначыла суразмоўца Край.бай, заданні падрыхтаваны незвычайныя, таму фінальная гульня будзе вельмі цікавай.

Пачатак мерапрыемства ў 15.00.

Кацярына СУШКО