“Лебедзеўскія выкрутасы” прывезлі Гран-пры з міжнароднага фестывалю “Звіняць цымбалы і гармонік” (фота, відэа)

Праграмма была вельмі насычаная: выставы, прэзентацыі, тэатралізаваныя прадстаўленні, конкурсы, забаўляльныя праграмы, канцэрты, спартыўныя спаборніцтвы і, канешне, святочны феерверк. Сёлета ў фестывалі бралі ўдзел калектывы з розных краін: Украіны, Латвіі, Расіі, Эстоніі, Літвы і Беларусі.

Удзельнікі фестывалю

“Лебедзеўскія выкрутасы” і Сяргей Ярук на фестывалі “Звіняць цымбалы і гармонік”

Гледачы маглі пачуць і ўбачыць выкананне твораў не толькі на традыцыйных музычных інструментах, але і такіх, як палка дажджу, акарыны, дыятанічныя цымбалы і інш.

Сярод прадстаўнікоў Мінскай вобласці на пастаўскім фестывалі былі музыка Сяргей Ярук і ансамбль дзіцячай школы мастацтваў з аграгарадка Лебедзева Маладзечанскага раёна “Лебедзеўскія выкрутасы”. Гэты ансамбль, а таксама яго ўдзельнікі неаднаразова атрымлівалі ўзнагароды на розных конкурсах.

Не стаў выключэннем і ўдзел у традыцыйным конкурсе фестывалю “Хто каго?”, дзе бяруць удзел як калектывы, так і асобныя выканаўцы на народных інструментах. Майстэрства і прафесіяналізм удзельнікаў зрабіў канцэртную праграмму конкурсу цікавай і разнастайнай. Прафесійнае журы пад кіраўніцтвам народнага артыста Беларусі Міхаіла Казінца аддало перавагу “Лебедзеўскім выкрутасам”, выступленне якіх зала праводзіла крыкамі “Брава!”. Яны атрымалі Гран-пры конкурсу сярод музычных калектываў, а іх кіраўнік Сяргей Ярук стаў лаўрэатам І ступені сярод сольных выканаўцаў.

Удзельнікі конкурсу “Хто каго?”

Сяргей Ярук і “Лебедзеўскія выкрутасы” на конкурсе “Хто каго?”

Сяргей Ярук стаў лаўрэатам І ступені сярод сольных выканаўцаў

"Лебедзеўскія выкрутасы" атрымалі Гран-пры конкурсу сярод музычных калектываў

Дана ЗАКРЭЎСКАЯ
Фота і відэа аўтара