На мемарыяле "Боркі" у Вілейскім раёне адбылася талака (ФОТА)
Хаценчыцкі сельвыканкам 12 кастрычніка арганізаваў талаку па добраўпарадкаванні тэрыторыі мемарыяла "Боркі".
Пра гэта рэдакцыі партала Край.бай паведаміў чытач Алесь Раткевіч.
Даведка. 5 мая 1943 года фашысты спалілі 23 двары і 95 мірных жыхароў вёскі Любча, 21 двор і 98 жыхароў вёскі Боркі. Адзіная жыхарка вёскі Боркі, што засталася ў жывых, Фаіна Анасовіч 1931 г.н. Цяпер жыве ў Рабуні.
kraj.by
"У талацэ прынялі ўдзел: Хаценчыцкі сельвыканкам, старшынёй якога з'яўляецца Святлана Валовік, настаўнікі і вучні Ільянскай школы, прадстаўнікі Ільянскага лясніцтва, старшыня Вілейскай суполкі Таварыства аховы помнікаў Дзяніс Канецкі са сваёй камандай, краязнаўца Алесь Раткевіч са сваімі аднадумцамі, сярод якіх – 86-гадовы мясцовы жыхар Уладзімір Барысевіч, чые карані ідуць менавіта з Борак. Дапамагалі таксама супрацоўнікі "Рэгіянальнай газеты". Фаіна Сяргееўна Анасовіч (Кучко), адзіная жыхарка Борак, што засталася ў жывых, накіравала на дапамогу сваю дачку Таццяну і яе мужа. Сабралася на талаку каля трох дзясяткаў чалавек", – піша Алесь Раткевіч.
Тэрыторыя была прыбраная ад лісця, галля, скошанай травы. Высеклі хмызняк, спілавалі дрэвы ля помніка, якія маглі зруйнаваць яго. А таксама, наколькі было магчыма, засыпалі каляіны, пакінутыя лесавозамі.
Стала нашмат прыстойней і святлей, лічыць Алесь Раткевіч.
Такія масавыя акцыі з 2010 года сталі традыцыйнымі. За гэтыя гады зроблена шмат па ўшанаванні памяці аб загінулых 4 мая 1943 года жыхарах вёскі: адноўленая дарога да пагоста, адрэстаўраваны помнік загінулым, вуліца ў Лукаўцы названая Любчанска-Боркаўскай. На вясну запланаваныя работы па падрыхтоўцы мемарыяла да святкавання 70-годдзя вызвалення Беларусі ад фашысцкіх захопнікаў.
Алесь РАТКЕВІЧ
Фота прадастаўлена Край.бай Алесем РАТКЕВІЧАМ
Читайте также
