Выстава мастака Эдуарда Мацюшонка пра сувязь з продкамі “Дзяды” адкрыецца ў Вілейцы 24 кастрычніка
Сустрэча з мастаком адбудзецца ў выставачнай зале імя Н.Ю. Сілівановіча ў 17.30. У гэты дзень будзе арганізаваны перфоманс, у якім змогуць прыняць удзел усе прысутныя.
Даведка Край.бай: Эдуард Уладзіміравіч Мацюшонак – яскравая постаць у мастацтве Вілейшчыны. Ён нарадзіўся 7 сакавіка 1958 года у вёсцы Манюта-2 Глыбоцкага раёна Віцебскай вобласці. У 1984 годзе скончыў мастацка-графічны факультет Віцебскага педінстытута. З гэтага года жыве і працуе ў Вілейцы выкладчыкам, а таксама кіруе студыяй выяўленчага мастацтва ў Вілейскім раённым цэнтры дадатковай адукацыі дзяцей і моладзі.
Як паведаміла Край.бай навуковы супрацоўнік Вілейскага краязнаўчага музея Надзея Аўдзей, мастак дэманструе свае карціны з 1985 года, прымае ўдзел у абласных і рэспубліканскіх выставах. Прайшло шмат яго асабістых выстаў не толькі ў Вілейцы, Глыбокім, Паставах і Мінску, але і ў Германіі і іншых краінах.
Трэба адзначыць, што творчасць Эдуарда Мацюшонка прасякнута адной галоўнай тэмай – прыгажосць роднай беларускай зямлі і філасофія жыцця на ёй.
Выстава “Дзяды” – гэта жывапісныя палотны, якія прыводзяць да разважання аб месцы чалавеку ў свеце і яго сувязі з продкамі. Яна прымеркавана да рэлігійнага свята памінання продкаў.
– Кожны дзень для беларуса меў сваё значэнне. У кожнага тыдня была свая сімволіка, але асноўным напаўненнем была субота. У гэты дзень ушаноўвалі дзядоў, прадзедаў – усіх продкаў. Кожную суботу беларус мусіў, калі не наведаць могілкі, то добрым словам успомніць тых, хто надзяліў яго праз гены здольнасцямі, перадаў яму свае лепшыя рысы, – рассказала Надзея Аўдзей.
Юлія ЛАХВІЧ па прэс-рэлізе, прадастаўленым Край.бай навуковым супрацоўнікам Вілейскага краязнаўчага музея Надзеяй АЎДЗЕЙ
Читайте также
