Сябры “Літаратурнай гасцёўні” з Вілейкі падаравалі ільянскім школьнікам кнігу сваіх твораў “Яшчэ не позна…” (ФОТА)
28 мая госці наведалі Ільянскую СШ імя А. Грымаця, дзе пазнаёміліся з народнымі музеямі “Вілейшчына літаратурная” і “Ільянскія далягляды”.
Пра гэта Край.бай паведаміла кіраўнік музея “Вілейшчына літаратурная” Роза Шэрая.
У Ілью прыехалі Антаніна Гарчакова (аўтар паэтычнага зборніка “Душа нанізвае радкі”), Надзея Дуровіч (у мінулым выбітная спартсменка), Галіна Капцюг (аўтар шэрагу артыкулаў у перыядычным друку), Зінаіда Крупская (аўтар чатырох уласных кніг і шэрагу калектыўных зборнікаў), Марыя Лазовік (аўтар публікацый у “Шляху перамогі”), Вера Сепселева (ленінградка-блакадніца).
Паважаныя госці падаравалі нашаму музею “Вілейшчына літаратурная” кнігу сваіх твораў “Яшчэ не позна…”, у якой, акрамя творчасці прысутных, змешчаны творы Барыса Манцэвіча і Аляксандра Навуменкі.
Дзеці не толькі з радасцю сустрэлі гасцей і наладзілі экскурсію, але чыталі іх творы, ставілі па іх сцэнкі. А потым запрасілі на кубачак гарбаты, паказалі свае набыткі да 70-годдзя вызвалення Беларусі ад фашысцкіх захопнікаў, прадставілі літаратурную кампазіцыю і фільм “Ільянскі пейзаж”.
Але самае галоўнае – гэта сардэчная гутарка прадстаўнікоў старэйшага пакалення з юнымі.
Кіраўнік школьнага народнага музея “Вілейшчына літаратурная” Ільянскай СШ імя А. Грымаця Роза ШЭРАЯ для Kraj.by
Фота прадастаўлены Край.бай Розай ШЭРАЙ
Читайте также
