Кнігу пра мінулае і сучаснасць Нарачанскага краю “Нарачанка і яе берагі” прэзентавалі ў Вілейцы 19 верасня (ФОТА)
Мерапрыемства прайшло ў чытальнай зале Вілейскай цэнтральнай раённай бібліятэкі імя Ганны Новік і сабрала каля 40 чалавек.
Пра гэта Край.бай паведаміла загадчыца аддзела абслугоўвання і інфармацыі цэнтральнай раённай бібліятэкі Людміла Тонкавіч.
Кніга выйшла з друку ў 2013 годзе. Яе аўтары – ураджэнцы Нарачанскага краю Анатоль Рогач і Сымон Барыс. Яна ўключае архіўныя звесткі і шматгадовыя назіранні аўтараў. Больш за 700 старонак выдання распавядаюць пра мінулае і сучаснасць Нарачанскага краю і яго жыхароў. Вялікая ўвага надаецца Любанскаму, Іжскаму, Нарачскаму сельсаветам Вілейшчыны і Занарачскаму і Сваткаўскаму Мядзельскага раёна. Тут змешчаны апісанне прыроды, гістарычны агляд, матэрыялы пра падарожжы, культурныя мерапрыемствы, фатаздымкі і іншае.
Ва ўступе да выдання пісьменнік Міхась Чарняўскі адзначыў, што перад тым, як яе скласці, аўтары даследавалі Нарачанскі край не адзін год, – гэта вынік іх дзейнасці, паведаміла суразмоўца.
Падчас мерапрыемства супрацоўнікі бібліятэкі расказвалі пра вядомых людзей тых мясцін, што трапілі ў нарысы. Дарэчы, два героя кнігі – ўдзельніца Вялікай Айчыннай вайны Валянціна Валынец і краязнаўца і архітэктар Анатоль Капцюг – былі сярод прысутных.
Па словах Людмілы Тонкавіч, мерапрыемства сабрала шмат моладзі, і гэта сустрэча стала для іх вельмі пазнавальнай.
Юлія ЛАХВІЧ
Фота з сайта vialejka.info
Читайте также
