Гран-пры свята-конкурсу “Гліняны звон” атрымаў Алег Капуста з Івянца (ФОТА)

Мястэчка вядомае як старадаўні цэнтр ганчарства. Таму і стаў ён месцам правядзення свята, якое ладзіцца раз у тры гады.

Партал Край.бай анансаваў гэта мерапрыемства.

Як паведаміла Край.бай кіраўнік народнага аб’яднання народных майстроў “Скарбніца” Валожынскага раённага цэнтра культуры Наталля Клімянок, на гэты раз у старажытнае мястэчка з’ехаліся 44 удзельнікі з дзевяці рэгіёнаў Міншчыны: Лагойскага, Вілейскага, Нясвіжскага, Салігорскага, Дзяржынскага, Слуцкага, Мінскага і Клецкага раёнаў. Валожынскі раён прадстаўлялі 18 чалавек.

Наталля Клімянок зазначыіла, што ў склад журы, якое ўзначальваў старшыня Беларускага саюза майстроў народнай творчасці прафесар Яўген Сахута, уваходзіла яна і былы дырэктар Івянецкага музея традыцыйнай культуры Алег Раманоўскі.

Тры гадзіны мелі ўдзельнікі конкурсу на творчы працэс, падчас якога нараджаліся новыя керамічныя творы, ганчарныя вырабы.

Журы вызначыла лаўрэатаў і дыпламантаў ў 11 намінацыях.

Вынікі конкурсу

Гран-пры свята-конкурсу аднадушна быў прысуджаны члену Беларускага саюза майстроў народнай творчасці керамісту з Івянца Алегу Капусце. Ад арганізатараў свята – аддзела ідэалагічнай работы, культуры і па справах моладзі Валожынскага райвыканкама – яму быў уручаны аэрагрыль.

Лаўрэатам у намінацыі “За зберажэнне і творчае развіццё мастацкіх традыцый ганчарства” прызнаны Іван Раманчук з Лагойскага раёна. Дыплом першай ступені атрымаў Уладзімір Сасноўскі з Валожынскага раёна.

Іван Раманчук з Лагойскага раёна

У намінацыі “За лепшую калекцыю твораў дробнай пластыкі” лаўрэатам стала Алена Смоліч з Салігорскага раёна. Дыплом першай ступені прысудзілі Васілю Шчэрбу са Слуцкага раёна, другой ступені – Ірыне Капусце з Валожынскага.

Лепшым сямейным калектывам ганчароў прызнана сям’я Скрыпка з Валожынскага раёна. Уладзімір, Вераніка і Насця Скрыпкі сталі лаўрэатамі ў гэтай намінацыі. Трэба адзначыць, што галава сям’і Уладзімір – ганчар у другім пакаленні. Яго бацька – Пётр Леўкавіч Скрыпка шмат гадоў адпрацаваў галоўным мастаком Івянецкага завода мастацкай керамікі. Дарэчы, дыплом “За творчы дэбют” атрымала самая юная ўдзельніца свята – шасцігадовая Насця Скрыпка.

Узнагароджваюць Насцю Скрыпку

Першае і другое месцы ў намінацыі “Лепшы сямейны калектыў ганчароў” заваявалі сем’і Сняжко з Клецкага і Савіч з Нясвіжскага раёна адпаведна.

Лаўрэатам у намінацыі “За высокае прафесійнае майстэрства, мастацкі густ і асабісты ўклад у развіццё традыцый ганчарства” прызнаны Мікалай Стрэльчанка з Лагойскага раёна. Дыпломамі за першае і другое месцы адзначаны адпаведна Сяргей Качына з Валожынскага і Ларыса Рамановіч са Слуцкага раёнаў.

У намінацыі “За лепшы выраб глінянага посуду” лаўрэатам прызнаны Валерый Лапа з Валожынскага раёна. Дыпломы за першае і другое месцы ў гэтай намінацыі ўручаны Вячаславу Адамовічу з Валожынскага і Наталлі Сабіч з Нясвіжскага раёнаў.

У намінацыі “За лепшы выраб дэкаратыўнай глінянай пластыкі” званне лаўрэата атрымала Таццяна Лістапад са Слуцкага раёна. Дыпломы за першае і другое месцы ўручаны Вераніцы Скрыпцы і Лізавеце Балбачан з Валожынскага раёна.

У гэтай намінацыі вялікая група керамістаў атрымала дыпломы трэцяй ступені: Павел і Іван Лявінскія, Дзмітрый Капуста і Таццяна Бяззубенка з Валожынскага раёна, Ангеліна Кулеш, Дар’я Смурага, Таццяна Проніна і Ілля Наўмовіч з Салігорскага раёна.

Павел і Іван Лявінскія

Лаўрэатам у намінацыі “За лепшую гліняную цацку” стала Надзея Гром з Мінскага раёна. Першае і другое месцы прысуджаны яе сяброўкам па камандзе – Ксеніі Чаркас і Лізавеце Карпавай.

Лаўрэатам у намінацыі “За лепшы гліняны музычны інструмент” прызнаны Міхаіл Бруй з Салігорскага раёна. Дыплом за першае месца ўручаны Наталлі Сідэрчык з Вілейскага раёна.

Званне лаўрэата ў намінацыі “За хуткасць, якасць і большую колькасць вырабаў” прысуджана Дзянісу Грому з Мінскага раёна. Аляксандру Худзяеву з Дзяржынскага раёна і Ангеліне Сухарукавай з Мінскага раёна ўручаны дыпломы за першае і другое месцы.

“За асабісты ўклад у выхаванне падрастаючага пакалення, арганізацыю пераемнасці мастацкіх традыцый апрацоўкі гліны” адзначаны настаўнікі Мікалай Пратасеня з Салігорскага і Леанарда Капуста з Валожынскага раёнаў.

Дыпломы ўдзельнікаў атрымалі Ілля Андронаў і Арцём Малажавы з Валожынскага, Ірына Лістапа са Слуцкага раёна.

У канцэртнай праграме прымалі ўдзел гурт “Івянецкія музыкі”, народны гурт “Сваякі” з Валожына і народны калектыў гумару “Дубінскія фанабэры”.

Наталля ШТЭЙНЕР
Фота прадастаўлены Край.бай Івянецкім домам культуры