9 ліпеня на свяце аграгарадка Вязынь Вілейскага раёна абралі “Чалавека года – 2016” (фота)
Падчас свята аграгарадка Вязынь жыхары атрымалі ўзнагароды за розныя дасягненні, а Таісія Нарэйка стала пераможцай у намінацыі “Чалавек года – 2016 аграгарадка Вязынь”. Мерапрыемства пад назвай “Вязынь мая, я – часцінак твая” зладзілі 9 ліпеня.
Як распавяла Край.бай дырэктар Вязынскага СДК Наталля Чарток, мерапрыемства адбылося пры падтрымцы мясцовага сельвыканкама, а таксама самых лепшых і добразычлівых вязынцаў, якія дапамагаюць дырэктару СДК.
Свята, па меркаваннні Наталлі Чарток, атрымалася даволі разнастайным: урачыстае адкрыццё, узнагароджанне жыхароў Вязыні, канцэртная праграма самадзейных артыстаў Вязынскага СДК і народнага вакальнага калектыву “Асалода” Раеўскага СДК Маладзечанскага раёна.
Удзельнікі аматарскага аб’яднання “Калейдаскоп” Вязынскага СДК прадставілі гледачам фрагмент купальскага абраду. Госці свята маглі пагуляць у лазертаг, пачаставацца вясковай кашай, патанцавать на дыскатэцы “ФайнаDISCO”. Для самых маленькіх працавала дзіцячая пляцоўка.
Адным з найбольш запамінальных момантаў мерапрыемства, зазначыла дырэктар Дома культуры, стала фаер-шоу ад гурта “Пламя жизни” Вілейскага Палаца культуры.
– Сёння наш аграгарадок – гэта дастойны населены пункт Вілейскага раёна. А галоўны скарб Вязыні – людзі! Яны праслаўляюць аграгарадок, нясуць у свет добрае імя беларусаў, – падкрэсліла Наталля Чарток.
Падчас свята жыхароў Вязыні ўзнагародзілі за розныя дасягненні. Свае першыя ў жыцці ўзнагароды атрымалі самыя маленькія вяскоўцы, якія нарадзіліся ў перыяд ад мінулага свята аграгарадка да сённяшняга.
Сярод іншых намінацый была і за лепшы падворак, у якой уганаравалі Віктара і Святлану Сухіх, Пятра і Таццяну Гаўрылік, Віктара і Галіну Чараповіч.
Тытул “Чалавек года – 2016 аг.Вязынь” атрымала фельчар Вязынскай урачэбнай амбулаторыі Таісія Нарэйка.
Кацярына СУШКО па матэрыялах, прадастаўленны Край.бай дырэктарам Вязынскага СДК Наталляй Чарток
Фота забяспечаны Наталляй Чарток
Читайте также
