Вадкі ахалоджаны кісларод выцякаў з вагона расійскага цягніка ў Смаргонскім районе
29 сакавіка на чыгуначным перагоне Пруды-Залессе машыніст пасажырскага цягніка заўважыў, што ў адным з вагонаў сустрэчнага цягніка адбываецца ўцечка вадкага рэчыва. Аб гэтым ён паведаміў на бліжэйшую чыгуначную станцыю.
Як паведамляе сайт Міністэрства па надзвычайных сітуацыях, у 19:22 на чыгуначную станцыю «Залессе» Смаргонскага раёна прыбыў грузавы цягнік, які рухаўся транзітам праз Рэспубліку Беларусь у г. Калінінград Расійскай Федэрацыі.
З Расійскай Федэрацыі выехала аварыйная брыгада і ўладальнік цыстэрны. З Мінска накіравана аналагічная цыстэрна з неабходным абсталяваннем для перапампоўкі звадкаванага кіслароду з аварыйнай ёмістасці. Для прадухілення кантакту звадкаванага кіслароду з прамасленымі шпаламі была праведзена пясчаная падсыпка.
Як рассказалі Краю на станцыі “Залессе”, у вагоне-цыстэрне (стаяў дзевятым з галавы цягніка) знаходзіўся вадкі ахалоджаны кісларод, які адносіцца да другой катэгорыі небяспечных рэчываў (выбуханебяспечны пры кантакце з нафтапрадуктамі). На станцыі патлумачылі, у цыстэрне была пашкоджана імпульсная трубка (паказчык узроўня), што знаходзілася на ніжнім узроўні ёмкасці. Ад працаўнікоў станцыі стала вядома, што 30 сакавіка увесь газ перакачалі ў другую цыстэрну, пасля чаго, адрамантаваўшы пашкоджаную, закачалі назад. Па іх словах, з 36 тон вадкага ахалоджанага кісларода засталося толькі 5,5. Небяспекі для наваколля не выяўлена. Як паведамілі на станцыі “Залессе”, 1 красавіка цыстэрну з астаткамі вадкага кісларода адправілі ў Маладзечна, пасля чаго груз накіруюць у Калінінград.
Сяргей ЛЕСКЕЦЬ
Читайте также
