«Я хачу паказваць свае карціны ў такіх гарадах, як ваш». Выстава мастака Сяргея Савіцкага адкрылася ў Смаргоні (фота)
7 кастрычніка ў Смаргонскім гісторыка-краязнаўчым музеі адбылося адкрыццё выставы карцін маладзечанскага мастака Сяргея Савіцкага «Нябеснае і зямное».
Сяргей Савіцкі прадставіў у Смаргоні 30 сваіх работ. У іх можна ўбачыць не толькі настальгічныя матывы па родным Забайкальскім краі, але і карціны, прысвечаныя рэлігійнай тэматыцы.
На адкрыцці выставы прысутнічалі навучэнцы сярэдняй школы №1, гарадской гімназіі, а таксама дзеці, якія дадаткова займаюцца маляваннем у Смаргонскай ДШМ імя М.-К. Агінскага і раённым цэнтры творчасці дзяцей і моладзі.
Сяргей Савіцкі, пачынаючы з 1992 года, удзельнічае ў розных выставах на тэрыторыі Беларусі, Польшчы, Італіі і ЗША. Многія свае работы аўтар суправаджае ўласнымі вершамі.
– У Смаргоні прадстаўлена толькі частка маёй творчасці. Большасць маіх работ знаходзіцца за межамі Рэспублікі Беларусь, – растлумачыў Сяргей Савіцкі. – Усюды жывуць людзі, паўсюль яны аднолькавыя. Але усе хочуць адчуваць сваю прысутнасць у нейкім прыгожым імгненні. Я хачу паказваць свае карціны ў такіх гарадах, як ваш.
Маладзечанскі мастак Сяргей Савіцкі
«Накцюрн»
Карціна «Лётнае надвор'е»
«Там, за аблокамі» і «Позірк»
«Пастыр»
«Сёмы анёл»
Сяргей Савіцкі растлумачыў, што карціну «Сёмы анёл» ён ствараў, не ведаючы, як яе назваць.
– Ішоў я неяк па начным горадзе, убачыў аблокі, поўню, а пазней намаляваў гэтую карціну. Тлумачэнне гэтай сваёй працы я потым знайшоў у Новым Запавеце, дзе былі змешчаны такія словы: «І анёл, якога я бачыў, стаячым на моры і на зямлі, падняў сваю правую руку да неба ...» Гэта ўрывак з кнігі Апакаліпсіса святога Яна пра сем анёлаў. Так я і назваў гэтую карціну, – растлумачыў мастак.
«Каля ракі»
«НЛА над Байкалам»
Сяргей ЮРЭВІЧ
Фота аўтара
Читайте также
