Выйшаў з друку новы выпуск альманаха «Куфэрак Віленшчыны»
Ён прысвечаны заходнебеларускаму паэту і педагогу Юльяну Сергіевічу.
Пра гэта Краю расказаў сябра рэдкалегіі Алесь Капуцкі.
Чатырнаццаты выпуск гісторыка-краязнаўчага і літаратурна-мастацкага альманаха «Куфэрак Віленшчыны» выйшаў з друку напрыканцы мая. Яго адкрывае артыкул Галіны Асіповіч «Голас далёкай маладосці», прысвечаны жыццю і дзейнасці Юльяна Сергіевіча.
Даведка. Юльян Іосіфавіч Сергіевіч – беларускі паэт і настаўнік, самадзейны мастак. Нарадзіўся 23 верасня 1910 года ў вёсцы Юраўшчына Ашмянскага павета Віленскай губерніі, цяпер Маладзечанскі раён.
У артыкуле – успаміны Галіны Асіповіч пра Юльяна Сергіевіча, яго фотаздымкі з сябрамі, аднавяскоўцамі, з жонкай Агатай. На вокладцы змешчана фота яго хаты. На форзацы – партрэт паэта, выкананы Алесем Грышкевічам.
У альманаху змешчаныя таксама артыкулы Уладзіміра Прыхача (са Смаргоні), Аляксандра Камінскага (Смаргонскі раён), Розы Шэрай (Вілейскі раён), галоўнага рэдактара «Куфэрка Віленшчыны» Міхася Казлоўскага (Маладзечна), дзённікавыя запісы Віктара Шніпа (родам з Валожыншчыны), іншых нашых землякоў.
Святлана ЦІШКО
Читайте также
