Вайцюшкевіч запрашае ўсіх да стварэння кліпа на новую песню на словы смаргонца Уладзіміра Някляева
Зміцер Вайцюшкевіч прэзентаваў на tuzin.fm студыйны запіс песні «Жыве Беларусь» на словы Уладзіміра Някляева і запрашае ўсіх узяць удзел у стварэнні «народнага» кліпа на яе. Відэа прымаецца да 25 мая ўключна. Пяць найбольш цікавых і актыўных удзельнікаў атрымаюць CD «Наша песня» з аўтографам Вайцюшкевіча.
Кампазіцыя патрапіць у новы альбом Вайцюшкевіча «Наша песня», прэзентацыя якога адбудзецца 6 чэрвеня на канцэрце ў Вільні. «Гэта песня пра нармальнае чалавечае пачуццё непарыўнай сувязі са сваёй краінай. Яно ва ўсім, што мы робім. Яно з намі кожны дзень, – распавядае Зміцер. – Запрашаю ўсіх узяць удзел у народным кліпе на яе.
Ідэя відэа ў тым, каб адысці ад плакатнага патрыятызму і сцягоў-транспарантаў. Давайце праспяваем гэтую песню ў працы і на адпачынку, з сябрамі, калегамі і роднымі людзьмі. Давайце пакажам, што мы добрыя, працавітыя, шчырыя людзі!»
Аўдыё можна паслухаць ТУТ.
Тэхнічныя пажаданні ад творчай суполкі «Тры макі», якая будзе ствараць відэа:
1) спявайце песню пад аўдыёзапіс твора, каб супадала хуткасць;
2) здымайце шырокае гарызантальнае відэа (не Instagram), пажадана на фотаапарат ці добры тэлефон;
3) відэа запампуйце на файлаабменнік (напрыклад, Wetransfer, Dropbox) і дашліце спасылку на мэйл todar.klip@gmail.com.
Відэа прымаецца да 25 мая (уключна). Пяць найбольш цікавых і актыўных удзельнікаў атрымаюць CD «Наша песня» з аўтографам Змітра Вайцюшкевіча.
Паводле tuzin.fm
Читайте также
