У вёсцы Ракаўцы Смаргонскага раёна мясцовыя жыхары паспаборнічаюць з крэўскімі на свяце-конкурсе "Добры дзень, суседзі!"

Аб гэтым Край.бай распавяла загадчык сектара культуры і вольнага часу Крэўскага дома культуры Жанна Бартош.

– Такое мерапрыемства мы ладзім упершыню, тым больш, першыя ў раёне, – адзначыла яна.

Па словах Жанны Бартош, старасты Ракаўцаў і Крэва павінны з мясцовых жыхароў набраць сабе каманду і 13 жніўня паспаборнічаць паміж сабой на свяце.

Кожная каманда на гэтым мерапрыемстве прадставіць свой падворак – сцэнічную пляцоўку, на якой яны будуць выступаць і дзе будуць выстаўлены іх традыцыйныя вясковыя стравы, выпечка, а таксама вырабы мясцовых майстроў.

Абедзвюм камандам прыйдзецца выявіць лепшага ў “Візітцы”, дзе яны прадставяць гасцям і журы сваю вёску, а таксама ў конкурсе “Таленты вёскі” і гумарыстычным конкурсе.

– Цікавым павінен быць конкурс “Беларускія прысмакі”, на якім каманды  прыгатуюць дзве беларускія традыцыйныя стравы. Таксама ўдзельнікам гэтага свята прапануюць звязаць сноп, пачысціць бульбу ў чыгунок, а затым паставіць яго ухватам у печ, сабраць мясарубку, перабраць бульбу – семянную асобна ад буйнай, забіць цвік у калодку і іншае, – дадала Жанна Бартош.

Падчас усяго свята плануецца канцэртная праграма і праца дзіцячых атракцыёнаў.

Свята-конкурс “Добры дзень, суседзі!” адбудецца у вёсцы Ракаўцы на пляцоўцы каля сельскай бібліятэкі-клуба. Пачатак – у 15.00.

Сяргей ЮРЭВІЧ