Майстры Смаргоншчыны сталі дыпламантамі рэгіянальнага фестывалю абрадаў і рамёстваў “Скарбы Гродзеншчыны”
Рэгіянальны фестываль абрадаў і рамёстваў упершыню адбыўся ў Лідзе ў сярэдзіне жніўня. Майстры Смаргонскага раёна сталі ўладальнікамі трох дыпломаў фестывалю.
Як паведаміла Край.бай дырэктар Смаргонскага раённага Дома рамёстваў Міраслава Расоцкая, удзел у фестывалі прымалі майстры ўсіх раённых Дамоў рамёстваў Гродзеншчыны. Праграма мерапрыемства была размеркавана на два дні.
У першы дзень фестывалю ў Лідскім Доме культуры адбылася рэгістрацыя ўдзельнікаў, былі прадстаўлены традыцыйныя стравы Гродзеншчыны, выстава выцінанкі, прэзентацыі нематэрыяльнай культуры рэгіёна.
У другі дзень ў вёсцы Гудзевічы Мастоўскага раёна адбыўся кірмаш, дзе майстры прадстаўлялі традыцыйныя рамёствы Гродзеншчыны. Наведвальнікамі кірмашу сталі не толькі мясцовыя жыхары, але і турысты з Польшчы.
“На рэгіянальным фестывалі абрадаў і рамёстваў нашы майстры прадстаўлялі ткацтва паясоў, ганчарства, саломапляценне, вязанне кручком, аплікацыю саломкай, лазапляценне, – дадала Міраслава Расоцкая. – І былі ўзнагароджаны трыма дыпломамі”.
Па яе словах, Смаргонскі раённы Дом рамёстваў атрымаў дыплом ІІ ступені фестывалю “Скарбы Гродзеншчыны” у намінацыі “Лепшая калекцыя выставачных работ традыцыйных рамёстваў”. Зоф’я Войтка, якая на фестываль прывезла вышываныя крыжом рушнікі, атрымала дыплом І ступені ў намінацыі “Вышыўка”. А сама суразмоўца Краю стала ўладальніцай дыплома фестывалю ў намінацыі “Ткацтва”.
Як зазначыла Міраслава Расоцкая, мяркуецца, што рэгіянальны фестываль абрадаў і рамёстваў “Скарбы Гродзеншчыны” будзе традыцыйным, а ў наступны раз пройдзе ў Смаргоні.
Вольга НЯЎЗОРАВА
Читайте также
