70-годдзе беларускага паэта Уладзіміра Някляева адзначаць у Смаргонскім раёне прэзентацыямі яго кніг
9 ліпеня спаўняецца 70 год беларускаму паэту, ураджэнцу Смаргоншчыны Уладзіміру Някляеву.
Як распавяла Край.бай бібліятэкар Сінькоўскай сельскай бібліятэкі Ірына Астрынская, 70-годдзе пісьменніка ў сценах іх установы адзначаць літаратурнай гадзінай і прэзентацыяй кніжнай выставы, на якой будуць прадстаўленыя зборнікі вершаў і паэм, а таксама перыядычныя выданні, у якіх у розныя часы сваёй творчасці друкаваўся Уладзімір Някляеў.
У фондах Сінькоўскай бібліятэкі знаходзяцца некалькі зборнікаў, сярод якіх самая першая кніга Уладзіміра Някляева “Адкрыццё” (1976), а таксама “Знак Аховы” (1983) і “Прошча” (1996).
Прэзентацыя кніжнай выставы запланавана на 12 ліпеня. Адпаведнае мерапрыемства адбудзецца і на малой радзіме паэта ў Крэве.
Даведка: Уладзімір Някляеў – паэт, грамадскі дзеяч і палітык. Нарадзіўся ў 1946 годзе ў Смаргоні. Скончыў Мінскі тэхнікум сувязі (1966), філфак Мінскага педінстытута (1973). З 1998 па 2001 год – старшыня праўлення Саюза беларускіх пісьменнікаў. У 1999 эміграваў з Беларусі. Вярнуўся ў Мінск у 2003 годзе. Быў кіраўніком Беларускага ПЭН-цэнтра (2005-2009). Лаўрэат шэрагу прафесійных і дзяржаўных узнагарод за літаратурную дзейнасць.
wikipedia.org
Сергей ЮРЭВІЧ
Читайте также
