У Залескім цэнтральным доме культуры Смаргонскага раёна прайшоў конкурс “Бабуля года” (ФОТА)

Аб гэтым піша сайт газеты “Светлы шлях”.

Як паведаміла Край.бай дырэктар раённага метадычнага цэнтра народнай творчасці і культурна-асветніцкай працы Тамара Сяменчанка, конкурс прайшоў 2 сакавіка.

Бабулі прадстаўлялі сябе і сваіх унукаў, якія ўсімі сіламі імкнуліся падтрымаць іх імідж. Удзельніцы прапанавалі таксама пакаштаваць стравы і прысмакі, якія самі прыгатавалі.

Падчас другога этапу конкурсу бабулі не проста ўгадвалі мелодыю песень, але і спявалі іх разам з прысутнымі. Самая галасістая аказалася бабуля Соня, а самая знаходлівая – бабуля Зіна, бо ёй давялося спяваць песню, якую яна ўпершыню пачула.

“Мінутай славы” стаў для ўдзельніц творчы конкурс. Удзельніца пад нумарам адзін, бабуля Люда, уразіла выкананнем усходняга танца. Яскрава выканалі прыпеўкі Вера і Соня. Жана памянялася ролямі са сваёй унучкай і ператварылася ў маленькую капрызную дзяўчынку. Свой артыстычны талент дэманстравала Зіна. А Кіра правяла сапраўдны майстар-клас, станчыўшы даўнішні танец.

На заключны этап “А вам слабо?” усе бабулі выйшлі на сцэну і з запалам выканалі танцавальны нумар.

Па прызнанні старшыні журы Таццяны Ражэвай, рашэнне наконт галоўнай пераможцы, якой прысуджаны тытул “Бабуля года”, супала з думкай большасці прысутных у зале.

Большая колькасць галасоў была аддадзена за Кіру Радзіонаву. У намінацыі “Бабуля – вясёлы нораў” пермагла Вера Зянько, самай эпатажнай прызнана Людміла Гружэўская, самай абаяльнай – Жана Шчуроўская. Тытул “Бабуля нашага часу” дастаўся Зінаідзе Паховіч, тытул “Мара ўнукаў” – Соф’і Сцяпанцавай. “Бабуля – прыклад для ўсіх” – у гэтай намінацыі лепшай стала Кіра Радзіонава.

Святочны настрой падчас імпрэзы падтрымлівалі мясцовыя самадзейныя артысты. А конкурсы сярод гледачоў унеслі сваю інтрыгу і парадавалі нечаканымі падарункамі.

Асобна ўшанавалі і самую багатую на ўнукаў бабулю Залескага сельсавета Аліну Дудко, якая мае трох сыноў і адзінаццаць унукаў, павіншавалі і адарылі яе актывісты ініцыятыўнай групы “Чырвоны крыж”.

Старшыня грамадскай суполкі “Сяльчанка” Ала Шыцікава, дзякуючы за падораныя станоўчыя эмоцыі і выдатны вясновы настрой, адзначыла, што большасць удзельніц конкурсу – сябры “Сяльчанкі” і актывісткі руху за ўстойлівае развіццё вясковых тэрыторый. Старшыня сельсавета Зянон Грышкевіч падзякаваў арганізатарам і ўдзельнікам свята.

Паводле газеты “Светлы шлях”
Фота са старонкі Алы Страшынскай у сацыяльнай сетцы Аднакласнікі