ФОТАРЭПАРТАЖ: У Паставах прайшоў фестываль народнай музыкі “Звіняць цымбалы і гармонік”

Сваё майстэрства прадэманстравалі захавальнікі народных музычных традыцый і фальклорнай спадчыны з усіх абласцей і сталіцы Беларусі, Расіі, Украіны, Венесуэлы, Славакіі, Польшчы, Літвы і Латвіі, паведамляе «Пастаўскі край».

Пра вытокі і сённяшні дзень свята народнай музыкі на яго адкрыцці гаварылі старшыня райвыканкама Віктар Гутараў, намеснік міністра культуры Васілій Чэрнік і намеснік старшыні аблвыканкама Уладзімір Цярэнцьеў. Яны зачыталі віншавальныя тэлеграмы, адрасаваныя ўдзельнікам, гасцям і гаспадарам фестывалю міністрам культуры Рэспублікі Беларусь Міхаілам Святловым і старшынёй абласнога выканаўчага камітэта Аляксандрам Косінцам.

Адкрыць творчую частку ўрачыстасці выпала Нацыянальнаму акадэмічнаму народнаму аркестру Рэспублікі Беларусь імя І. Жыновіча і яго мастацкаму кіраўніку, народнаму артысту краіны, прафесару, лаўрэату Дзяржаўнай прэміі Рэспублікі Беларусь, нязменнаму старшыні журы фестывалю Міхаілу Казінцу.

На гэты раз прафесійны калектыў паўстаў у абноўленым скла­дзе. У ім саліравалі на цымбалах былыя і цяперашнія выхаванкі Пастаўскай школы мастацтваў імя Антонія Тызенгаўза, лаўрэаты міжнародных і рэспубліканскіх конкурсаў, стыпендыяты Спецыяльнага фонду Прэзідэнта Рэспублікі Беларусь па падтрымцы таленавітай моладзі Лізавета Глазава, Аляксандра Пал­кіна, Аляксандра Барысюк і Марыя Міхайлава.

Затым да прафесіяналаў далучыўся і заслужаны аматарскі калектыў Рэспублікі Беларусь фальклорны ансамбль “Паазер’е” выкладчыкаў мастацкай школы.

Журы, жыхары горада і сельскіх населеных пунктаў (а на канцэртных пляцоўках многіх з іх выступалі канкурсанты) сустрэлі выступленні народных ансамбляў “Талака” Полацкага ГДК, “Каданс” і “Кірмаш” (г. Заслаўе), “Ігуменскія крыніцы” (г. Чэрвень), “Быліна” (г. Гомель), “Алі Прымера” Лацінаамерыканскага культурнага цэнтра імя Сімона Балівара з г. Мінска. Яны сталі лаўрэатамі першай ступені.

Усяго званні лаўрэатаў і дыпламантаў атрымалі каля 50 індывідуальных выканаўцаў, інструментальных і народных ансамбляў з Мінска, Бабруйска, Жа­бінкі, Слоніма, Вілейкі, Чэрвеня, Ржэва, Курска, Пушкіна, Кіева, Семятычаў, Швянчоніса, Купішкіс, Рэзэкнэ і іншых гарадоў.

Уладальнікам Гран-пры фестывалю стаў гарманіст, выкладчык вілейскай гімназіі №2 Барыс Харэвіч. Яму таксама прапанаваны кантракт на ўдзел у канцэрце Нацыянальнага акадэмічнага народнага аркестра Рэспублікі Беларусь імя І. Жыновіча “Музыка без межаў”.

Дыпломам фестывалю “Лаўрэат ІІ ступені” узнагароджаны ансамбль народнай музыкі і песні “Заранка” выкладчыкаў Варапаеўскай дзіцячай школы мастацтваў (кіраўнік — Валянцін Жагула).

У намінацыі “Дзіцячая творчасць” лаўрэатамі сталі навучэнцы Пастаўскай школы мастацтваў Яўгеній Вайцяхоўскі і Іван Жаўнярук (дуэт баянаў, 2-е месца), Аляксандра Палкіна (цымбалы, 2-е месца).

Дыплома “Удзельнік фестывалю” удастоена вучаніца Навасёлкаўскай дзіцячай школы мастацтваў Анастасія Зінчанка (баян).

Пастаўскі фестываль адметны тым, што ў розных святочных мерапрыемствах разам з прафесійнымі, вядомымі калектывамі прымаюць удзел аматарскія. Сёлета пастаўчане далучыліся да высокага танцавальнага, музычнага і песеннага мастацтва Беларускага дзяржаўнага харэаграфічнага ансамбля “Харошкі”, Дзяржаўнага камернага аркестра Рэспублікі Беларусь, духавога аркестра Смаргонскай пагранічнай групы, ансамбля барабаншчыц Глыбоцкага РДК, ансамбля бальнага танца “Фартуна” г. Полацка і іншых калектываў.

У рамках фестывалю прайшлі музычна-тэатралізаваныя прадстаўленні “Пастаўскі баль”, “Музыка беларускіх палацаў і сядзіб”, “Мой любы горад”, раённы агляд-конкурс сельскіх панадворкаў, канцэрт класічнай музыкі ў пастаўскім касцёле і іншыя мерапрыемствы.

Па матэрыялах «Пастаўскага краю»