Гісторыя сінагогі, школы-інтэрната і дражджавога завода – у Ашмянах 24 лістапада адчыне свае дзверы гістарычная гасцёўня
24 лістапада ў Ашмянскім краязнаўчым музеі імя Ф.К. Багушэвіча адкрыецца гістарычная гасцёўня “Гарады не старэюць…”, прысвечаная 675-годдзю Ашмян. Пачатак – у 15.00. Уваход вольны.
Падчас гэтага мерапрыемства наведвальнікі гасцёўні змогуць больш падрабязна пазнаёміцца з гісторыяй свайго горада, а таксама яго асобных старажытных будынкаў – такіх як сінагога і школа-інтэрнат. Апошняя за часы свайго існавання паспела пабываць палітычнай вязніцай, польскай гімназіяй і настаўніцкім вучылішчам. І толькі з канца 1950-х гадоў гэты будынак стаў школай-інтэрнатам для дзяцей-сірот, паведамілі Край.бай у Ашмянскім краязнаўчым музеі.
Аматарам гісторыі раскажуць і пра станаўленне найстарэйшага прадпрыемства раёна – дражджавога завода.
У праграме мерапрыемства таксама запланаваны прыезд старажылаў Ашмян і вядомых жыхароў горада – кампазітара Мікалая Розенберга і паэта Пятра Шаколы. Яны раскажуць пра тое, якім быў горад ў часы іх маладосці.
Музычным госцем гістарычнай гасцёўні “Гарады не старэюць…” стане ансамбль народнай песні “Жытніца”.
Сяргей ЮРЭВІЧ
Нашли ошибку в тексте? Выделите ее и нажмите Ctrl + Enter