Тысячы віляйчан сабраліся на асвячэнне місійнага крыжа (ФОТА)

3–10 сакавіка ў вілейскай парафіі Узвышэння Святога Крыжа адбыліся парафіяльныя місіі. Асаблівыя духоўныя практыкаванні прымеркаваны да 100-гадовага юбілею, які ў Вілейцы адзначаць сёлета, паведамляе catholic.by.

Місіі правялі айцы місіянеры: кс. Дзмітрый Занямонскі, пробашч парафіі Святых Апосталаў Пятра і Паўла і св. Яўгена дэ Мазэно ў Мінску, а таксама кс. Анджэй Юхневіч, пробашч і кусташ санктуарыя Маці Божай Фацімскай у Шуміліне, што на Віцебшчыне. Святары належаць да супольнасці Місіянераў Аблатаў Беззаганай Панны Марыі.

Парафіяльныя місіі — гэта больш працяглыя па часе рэкалекцыі (духоўныя практыкаванні), якія ў каталіцкіх парафіях праходзяць прыкладна раз на 10 гадоў. Яны закліканы аднавіць веру парафіянаў. Місіі ўключаюць у сябе рэкалекцыйныя навукі для розных груп і набажэнствы (аднаўленне шлюбнай прысягі для сужонкаў, сакрамэнт споведзі, Эўхарыстыя, намашчэнне хворых). Місіі праводзяць айцы місіянеры.

У дзень, прысвечаны хворым i людзям сталага ўзросту, ўдзяляўся сакрамэнт намашчэння хворых i адбылося набажэнства з люрдскiм благаслаўленнем. А тых, хто не змог быць у касцёле па прычыне хваробы ці слабасці, айцы місіянеры наведалі ў шпіталях і кватэрах.

Пад час святой Iмшы для сем’яў вернікі дзякавалі Пану Богу за дар сужэнства. Удзельнікі літургіі аднавілі сужэнскія абяцанні, складзеныя нават шмат гадоў таму. Наступны дзень быў прысвечаны Эўхарыстыі. Пасля святой Імшы адбылося эўхарыстычнае набажэнства з працэсіяй вакол касцёла.

Апошні дзень быў прысвечаны разважанням аб крыжы як алтары, на якім здзейснілася справа адкуплення і найбольш праявілася Божая любоў да чалавецтва.

Тым часам у парафіі праходзілі працы па ўстаноўцы місійнага крыжа. Край.бай паведамляў аб тым, што Крыж быў усталяваны 6 сакавіка.

На заканчэнне парафіяльных місій 10 сакавіка ў 10.00 адбылася ўрачыстая святая Імша, якую ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч, а пасля быў асвечаны місійны крыж.

Тысячы вілейчан і гасцей у адзін голас вызнавалі веру ў адзінага Бога ў Трох Асобах. Падыходзячы да крыжа, кожны з прысутных прысягаў на вернасць Езусу Хрысту.

Галоўныя юбілейныя ўрачыстасці адбудуцца 14 верасня з удзелам Мітрапаліта Тадэвуша Кандрусевіча і іншых шматлікіх гасцей.

Па матэрыялах catholic.by