Сквер славутых землякоў Глыбоччыны папоўніўся бюстам геатэхніка Юрыя Сабалеўскага (ФОТА)

Край.бай анансаваў гэтую падзею.

Юрый Сабалеўскі быў прафесарам, доктарам тэхнічных навук, лаўрэатам Дзяржаўнай прэміі Рэспублікі Беларусь, заслужаным будаўніком Беларусі, заснавальнікам і шматгадовым кіраўніком беларускай школы геатэхнікі, аўтарам праекта будаўніцтва Мінскага метрапалітэна. Ён унёс асабісты ўклад у вызваленне Глыбокага ад нямецка-фашысцкіх захопнікаў.

На адкрыцці манументальнай скульптуры Юрыя Сабалеўскага было прадастаўлена слова старшыні Глыбоцкага райвыканкама Алегу Морхату.

З прамовай выступіў таксама сын Юрыя Аляксандравіча – прафесар, доктар тэхнічных навук Дзмітрый Сабалеўскі. Ён падарыў старшыні райвыканкама кнігу Аляксандра Сабалеўскага “Глубокое. Очерки истории”. “Тут ёсць шмат маляўнічых і цікавых момантаў, якія, магчыма, не ўсім вядомыя”, – адзначыў Дзмітрый Сабалеўскі.

На адкрыцці таксама прысутнічаў пляменнік Юрыя Аляксандравіча, капітан першага рангу, начальнік упраўлення ваенна-марскога флоту Міністэрства абароны Расійскай Федэрацыі Антон Сабалеўскі. Ён прапанаваў усталяваць у Глыбокім яшчэ адну гарадскую скульптуру – рыбака.

У завяршэнне мерапрыемства родным Юрыя Сабалеўскага ўручылі сувеніры.

Анастасія ЖУРАЎСКАЯ
Фота аўтара і Яўгена ЦЯЛІЦЫ