Начальнік аддзела культуры: “Дзеці з Азербайджана ад’язджалі з Браслава са слязьмі на вачах” (ФОТА)

Зранку зноў пайшоў дождж. На цэнтральнай плошчы горада побач з райвыканкамам выстрайваліся калоны айчынных і замежных фальклорных калектываў, госці і ўдзельнікі святкавання.

Заўважаны былі прадстаўнікі дыпламатычнага корпуса: надзвычайны і паўнамоцны пасол Рэспублікі Беларусь у Латвіі Аляксандар Герасіменка, генеральны консул Рэспублікі Беларусь у горадзе Даўгаўпілсе Віктар Гейсік, першы сакратар Пасольства Балеварыйскай Рэспублікі Венесуэла ў Рэспубліцы Беларусь Херардо Эстрада Марцінас, консул Латвіі ў горадзе Віцебску Дагнія Лацэ-Ате, віцэ-консул Латвіі ў горадзе Віцебску Яніс Рупейкс. А таксама беларускія афіцыйныя асобы: член Савета Рэспублікі Нацыянальнага сабрання Рэспублікі Беларусь, генеральны дырэктар “Віцебскаблгаз” Пётр Шэршань, дэпутат Палаты прадстаўнікоў Нацыянальнага схода Рэспублікі Беларусь Эдуард Казура, начальнік упраўлення ўстаноў культуры і народнай творчасці Міністэрства культуры Рэспублікі Беларусь Вадзім Шчэрбіч, намеснік старшыні Віцебскага аблвыканкама Уладзімір Цярэнцьеў.

Сцяг горада даручылі ўзняць уладальнікам звання “Чалавек года Віцебшчыны” Івану Маслоўскаму і Ларысе Рыбаковай. Затым прагучаў неафіцыйны гімн Браслаўшчыны. Па словах начальніка аддзела культуры Галіны Каратковай, у спеве прынялі ўдзел да пяцісот чалавек.

Школьнікі са сцягамі краін-удзельніц фестывалю выстраіліся на цэнтральнай плошчы і шэсце пад гукі вайсковага аркестра рушыла святочнай калонай да лесапарка. Следам за афіцыйнымі асобамі рушылі музычныя калектывы з Літвы, Латвіі, Эстоніі, Польшчы, Расіі, Украіны, Венесуэлы і Азербайджана.

Беларускія дзяўчаты праапрануліся ў венесуэлак (пярэстка адзеліся і пафарбаваліся) і танчылі пад гукі барабанаў і гучна выкрыківалі “Ве-не-су-эла!”. Гэта не магло не спадабацца прадстаўніку венесуэльскай телебачання, які ў чорнай бейсболцы і даўгім плашчы з перавязаным вокам нагадваў пірата і вёў запіс рэпартажа ў своеасаблівай манеры.

Жыхары горада, хто з вокнаў сваіх дамоў, хто наўзбоч дарогі, віталі ўдзельнікаў фестывалю. Пасля распачаўся гала-канцэрт, тут замежныя ўдзельнікі паказвалі багацце ўласнай культуры праз традыцыйныя спевы і танцы. Ярчэй за ўсіх выступіў маладзёжны танцавальны ансамбль з Азербайджана “Azeri”.

На завяршэнне фестывалю адбыўся канцэрт беларускага эстраднага выканаўцы Дзядзі Вані.

“Мне цяжка даць адзнаку праведзенаму мерапрыемству, бо гэта будзе выглядаць аднабакова. Скажу, што нашы госці ад’язджалі задаволенымі, - адзначыла Краю начальнік аддзела культуры Галіна Караткова. - Мы заўсёды намагаемся запрасіць новыя замежныя калектывы, хоць маем і сталых гасцей. Сёлета 60 % выступоўцаў былі на Браслаўшчыне ўпершыню. Гэта вельмі добрая рэклама нашаму гораду і рэгіёну. У нас у планах запрасіць на наступны год прадстаўнікоў з Турцыі. Дарэчы, вельмі у нас спадабалася маленькім прадстаўнікам Азербайджана, яны са слязьмі на вачах ад’язджалі з Браслава”.

Усе фота можна паглядзець ТУТ.

Край пісаў навіны пра першы і другі дзень фестывалю.

Сяргей ЛЕСКЕЦЬ
Фота аўтара