25 жніўня Глыбокае сустрэла ўдзельнікаў фестывалю «Magnificat-2014» (ФОТА)
Х юбілейны Міжнародны каталіцкі фестываль хрысціянскіх фільмаў і тэлепраграм «Magnificat-2014» пачаўся 24 жніўня ў Мінску, а зараз праходзіць у Глыбокім. На бліжэйшыя дні ўдзельнікі кінафестывалю запланавалі выезды ў Мосар, Удзела, Івесь.
Сустракалі глыбачане гасцей хлебам-соллю і песнямі пад гармонік.
У зале пасяджэнняў райвыканкама старшыня Глыбоцкага райвыканкама Алег Морхат павітаў удзельнікаў фестывалю і пажадаў усім прыемнага прагляду кінафільмаў.
Заснавальнік і арганізатар «Magnificat-2014» рэжысёр Юрый Гарулёў адзначыў, што Глыбокае для ўдзельнікаў фестывалю за гэтыя гады стала родным і блізкім.
– У год святкавання 600-годдзя вашага горада мы таксама адзначаем юбілей – 10-годдзе. Хоць гэты тэрмін і непараўнальны з вашым, але для нас вельмі вялікі і вельмі значны, – падкрэсліў Юрый Гарулёў.
Кіраўнік фестывалю пажадаў глыбачанам вялікіх поспехаў і росквіту.
Пасля сустрэчы мясцовыя жыхары разам з гасцямі горада прайшлі шэсцем да Парка Перамогі і ўсклалі вянкі і кветкі.
На фестывалі хрысціянскіх фільмаў «Магніфікат» ужо пачаліся конкурсныя прагляды. Першы фільм, што паказалі ў Глыбокім, – «Зіма міне» беларускага аўтара і рэжысёра Таццяны Кіракозавай.
За пяць дзён журы прагледзіць больш за 40 карцін з 16 краін. Геаграфія краін-удзельніц юбілейнага фестывалю ўражвае: Арменія, Вялікабрытанія, Грузія, Ізраіль, Італія, Іспанія, Сербія, ЗША, Украіна, Францыя, Харватыя, Польшча, Расія і Беларусь.
Сярод краін, якія ўдзельнічаюць упершыню, – Казахстан і Македонія.
Сярод рэжысёраў, якія даслалі свае працы на конкурс, – Вольга Дашук, Ірына Волах, Аляксандр Купрын, Кшыштаф Журоўскі, Юрый Каліна, Юрый Захватаеў і іншыя.
Рэжысёры прывезлі дакументальнае кіно, фільмы-партрэты, мультыплікацыю. Гэтыя работы пакажуць не толькі прыхільнікам «духоўнага» жанру, а таксама на прадпрыемствах і ў дзіцячай бібліятэцы.
Усе навіны аб «Magnificat-2014» – у спецыяльнай рубрыцы партала Край.бай.
Анастасія ЖУРАЎСКАЯ
Фота аўтара
Читайте также
