Кукол мастерицы из Мядельского района показали на международной выставке в Гродно

Як расказала Kraj.by Зоя Серада, лялькамі яна займаецца ўжо сем гадоў, ніякай спецыяльнай адукацыі ў яе няма.

— Да ўсяго даходзіла сама. Як бачу, як адчуваю, так і раблю. Трэба сказаць, што да нядаўняга часу маёй любоўю была тэхніка «скульптурны тэкстыль», гэта калі лялька робіцца толькі з тканіны і тэкстыльных валокнаў, але апошнім часам пачала спрабаваць сябе ў камбінаванай тэхніцы, калі бачныя часткі — галава, рукі і ногі — лепяцца са спецыяльнай палімернай гліны, а тулава шыецца з тканіны, — дзеліцца майстрыца. — Менавіта ў гэтай тэхніцы выканана мая апошняя калекцыя лялек «Тры сястры», якая прымае ўдзел у выставе KUKLA што праходзіць цяпер у Гродна.

Ідэя калекцыі прыходзіла паступова, неяк павольна, у працэсе работы. Яна гаворыць, што спачатку хацела проста зрабіць трох дзяўчынак у народным стылі, нешта накшталт купальскага карагода. Пакуль рабіла целы, то асацыяцыя «тры дзяўчынкі — тры краіны» не давала спакою. І таму, калі справа дайшла да роспісу і касцюмаў, вырашыла  ўвасобіць вобразы трох братніх народаў.

Перадаваць асаблівасці нацыянальных касцюмаў аўтар не імкнулася, не ставіла такой задачы, нават наадварот, дала волю сваім адчуванням і фантазіі. Агульнае ва ўсіх трох лялек — ніжнія сарочкі. Яны сшытыя з перадачай аўтэнтычнага народнага крою і тое, што аднолькавыя — гэта нібыта аб’ядноўваючы ўнутраны змест, увасабленне агульных славянскіх рысаў, адзінага кораня.

Усё астатняе — колер валасоў і вачэй, фасон і колеры адзення, вышыўка — гэта тое адметнае, непаўторнае, асаблівае, што ёсць у кожнага народа.

— Не была ўпэўнена, што ідэю калекцыі прымуць усе станоўча. Але калі правяла анлайн прэзентацыю, то зразумела, што хваляванні напрасныя, ідэя зайшла, а лялек купілі ў той жа дзень, калі я іх паказала, — кажа Зоя. — Таму на выставе яны не прадаюцца, чакаюць ад’езду да сваіх калекцыянераў.

Дарэчы, па словах майстрыцы, выставы такога маштабу  — з’ява неардынарная. Колькі год таму Надзея Цыганоўская арганізоўвала ў Мінску міжнародную выставу лялек «Панна Doll’я», але потым яна пераехала ў Расію. «KUKLA» праводзілася спачатку ў Гомелі як выстава вузкага кола аўтараў, але паступова набірае папулярнасць і вось цяпер у ёй прымае ўдзел ужо больш за 200 майстроў з некалькі краін.

Субяседніца выказвае надзею, што мастацтва лялькі ў Беларусі стане такім жа папулярным, як у Расіі і іншых краінах свету.

Тым больш, што таленавітых майстроў у нас сапраўды шмат, ёсць кім ганарыцца і каго паказаць. І колькасць калекцыянераў таксама расце.

Уласная інфармацыя

Фота Зоя Серада