В сельском доме культуры выходной. Прошлись по улицам агрогородка Нарочь, поздравили жителей с праздником

Вуліцы вёскі выглядаюць больш пустымі ў параўнанні са звычайнымі працоўнымі днямі. Падумалася, што ўсе пайшлі ў цэнтр, але і там людзей было зусім мала. І машын ля крамаў значна менш, чым звычайна. Напэўна, мясцовыя жыхары выкарыстоўваюць доўгія выхадныя для паездак або хатніх спраў.

Кінулася ў вочы адсутнасць якога-небудзь намёка на свята.

Ля банкамата стаялі некалькі чалавек сярэдняга ўзросту. На пытанне журналіста пра тое, якое сёння свята, яны адразу адказалі, што гэта дзень Кастрычніцкай рэвалюцыі.

— Толькі мы яшчэ і помнім пра свята! У моладзі спытайцеся, дык яны нічога не скажуць, — працягвае гаворку жанчына.

З’явілася думка распытацца ў работнікаў культуры, ці ладзяцца якія мерапрыемствы, прысвечаныя гэтаму дню, але дзверы Дома культуры аказаліся зачыненыя. Па раскладу панядзелак і аўторак выхадныя. Інфармацыі пра мерапрыемствы ў гэты дзень нідзе не бачна.

Паколькі людзей на вуліцы амаль не было, прыйшлося задаць пытанні прадаўцам некалькіх крамаў, што размешчаны на цэнтральнай плошчы. Больш старэйшыя ўсміхаліся, ківалі і віншавалі ў адказ.

Бачна, што людзі старэйшага пакалення яшчэ помняць тыя часы, калі свята Вялікага Кастрычніка было значным і святкавалася шумна і ярка. Некаторыя ўспаміналі, як хадзілі на дэманстрацыі і мітынгі, ахвотна дзяліліся сваімі ўспамінамі і дадавалі, што цяпер усё змянілася, няма таго, што было ў часы іх дзяцінства і маладосці.

Маладыя ж людзі, у большасці, прызнаваліся, што не ведаюць, якой падзеі прысвечаны гэты выхадны, а ў адказ на пытанне, як называецца свята, маглі сказаць толькі: «Седьмое ноября».

У адным двары хлопец займаўся рамонтам аўтамабіля. У адказ на віншаванні са святам Дзмітрый схамянуўся, задумаўся, а потым адказаў:

— Няма сёння ў католікаў ніякага свята! Я таму вось рамонтам заняўся, у свята звычайна не працую!

— Дык сёння не рэлігійнае свята, а дзяржаўнае. Выхадны вось у людзей чаму?

— А я два праз два раблю, нават не ведаў, што выхадны сёння!

Зоя СЕРАДА

Фота аўтара

Больше новостей в нашем Telegram