Зрабі свой горад лепшым. "Кірмаш праектаў для Маладзечна" стартаваў 24 кастрычніка

Пра гэта парталу Край.бай паведаміў аргкамітэт конкурсу.

Што такое “Кірмаш праектаў”?

Кірмаш праектаў – гэта даволі новы фармат публічных мерапрыемстваў і ўяўляе сабой конкурс ідэй, якія здольныя вырашыць нейкія культурніцкія і/ці сацыяльныя праблемы горада. Кампанія “Будзьма беларусамі!” ладзіць такія конкурсы ў розных гарадах Беларусі, каб дапамагчы мясцовым жыхарам знайсці рашэнне важных пытанняў. Калі так будзе ў кожным гарадку ці мястэчку, лепшым стане жыццё і ва ўсёй краіне.

“Будзьма беларусамі!” аб’ехала з “Кірмашамі” Віцебск, Магілёў, Брэст, Гродна, Рагачоў і іншыя гарады і мястэчкі Беларусі. Дзякуючы гэтаму фармату многія цікавыя гарадскія ініцыятывы здзейсніліся, іх ініцыятары пазнаходзілі аднадумцаў і для рэалізацыі іншых цікавых праектаў. Да прыкладу, сёлета “Кірмаш праектаў” у Віцебску дапамог узбагаціць Дзень горада і Дзень моладзі мноствам адметных падзей. Сярод іх – Летні маркет “Барадулінкі”, фестываль актыўнага адпачынку “Свята ветру”, турнір па футбольным фрыстайле “Вежа”, першая агульнагарадская фотасушка, “Спеўны сход” і нават вулічныя майстар-класы па танцах.

“Кірмаш праектаў” – гэта месца, дзе вы зможаце падзяліцца сваёй ідэяй з неабыякавымі людзьмі, знайсці аднадумцаў, якія дапамогуць вам карыснымі парадамі, важнымі сувязямі, непасрэдным удзелам у вашым праекце, а часам і фінансава.

“Кірмаш праектаў” – гэта месца, дзе збіраюцца культурніцкія прапановы, іх аўтары і крытыкі. Удзел у конкурсе ідэй "Кірмаш праектаў для Маладзечна" – гэта шанец супольнымі высілкам зрабіць сваю мару рэальнасцю, зрабіць любімы горад лепшым!

Дасылайце свае ідэі на анлайн-кірмаш да 7 лістапада 2016 года!

Як паўдзельнічаць

Каб стаць удзельнікам конкурсу, неабходна да 7 лістапада апублікаваць сваю ідэю на Talaka.by і сабраць 10 пазнакаў «Важна». У апісанні ідэі трэба распавесці пра:

- сутнасць ідэі (што менавіта вы хочаце прадставіць: праект, стратэгію, кампанію, канцэпцыю і г.д.);
- мэты і задачы (чаму і каму гэты праект неабходны?);
- фармат праекта, яго ўнікальнасць і (ці) неабходнасць;
- калі і дзе ідэя мусіць рэалізавацца;
- якія рэсурсы вы ўжо маеце і якія шукаеце (каманда, дзеянні, партнёры, бюджэт).

Удзел могуць браць усе ахвотныя: дзяржаўныя і недзяржаўныя арганізацыі, фізічныя асобы, творчыя групы і ініцыятывы. Пасля збору ідэй арганізатары разам з экспертамі вызначаць найбольш цікавыя праекты, якія будуць публічна прэзентаваныя ў Маладзечне.

Дадатковую інфармацыю можна атрымаць па тэлефоне +375 (29) 712-18-03, razam@budzma.org.

Партал Край.бай з'яўляецца інфармацыйным партнёрам конкурсу.