Смаргонская паэтка Таццяна Скарынкіна пазнаёміць землякоў са сваёй кнігай «Шмат Чэслава Мілаша, крыху Элвіса Прэслі»
7 снежня ў зале Смаргонскай раённай бібліятэкі адбудзецца прэзентацыя новай кнігі прозы смаргонскай паэткі Таццяны Скарынкінай «Шмат Чэслава Мілаша, крыху Элвіса Прэслі». Пачатак – у 17.30. Уваход на мерапрыемства вольны.
Як паведаміла Край.бай дырэктар Смаргонскай раённай бібліятэкі Зоя Дурэйка, прэзентаваць сваю кнігу будзе сама аўтар. Мерапрыемства наведаюць прадстаўнікі аддзела ідэалогіі, культуры і па справах моладзі Смаргонскага райвыканкама.
Менавіта кніга Таццяны Скарынкінай «Шмат Чэслава Мілаша, крыху Элвіса Прэслі» была ўключана ў бягучым годзе ў шорт-ліст на літаратурную прэмію Ежы Гедройца, якую аб’явілі 12 кастрычніка ў Мінску.
Падчас мерапрыемства ў наведвальнікаў бібліятэкі будзе магчымасць пазнаёміцца не толькі з кнігай, але і з багатай творчасцю аўтара, дадала Зоя Дурэйка.
Суразмоўца парталу дадала, што Таццяна Скарынкіна ўжо мела вопыт прэзентацыі сваёй кнігі ў Смаргоні. У мінулым яна прадстаўляла тут зборнік вершаў «Книга для чтения вне помещений и в помещениях».
Даведка Край.бай: Таццяна Скарынкіна нарадзілася ў 1969 годзе ў Смаргоні. Выпускніца Горацкай сельскагаспадарчай акадэміі. Працавала ілюстратарам дзіцячых кніг, паштальёнам, журналістам, калумністам. Друкавалася ў айчынных папяровых выданнях «Зорька», «Першацвет», «Няміга літаратурная», «Маладосць», «Народная воля», «Мінская школа», «Arche», у маскоўскім «Воздухе», у часопісах «Крещатик» (Германія), Лава (Украіна), «Аналогон» (Чэхія), «Сибирские огни» (Расія), у сеткавых выданнях «Полутона», «TextOnly», «Двоеточие», «Лиterraтура» і інш.
Вершаваныя зборнікі Таццяны Скарынкінай: «Книга для чтения вне помещений и в помещениях» (Мінск, «Кнігазбор», 2013 г.) і «Португальские трехстишия» (Нью-Йорк, «Айлурос», 2014 г.). Яе вершы перакладаліся на іўрыт, польскую, чэшскую, італьянскую і англійскую мовы. Сябра ПЭН-цэнтра.
Сяргей ЮРЭВІЧ
Читайте также
