Маладзечанскія бібліятэкары: “Моладзь шмат ведае пра Багдановіча” (фота)
7 снежня ў бібліятэцы сямейнага чытання “Верасок” адбылася вечарына памяці беларускага паэта Максіма Багдановіча. Мерапрыемства пад назвай “Вечнае святло Максімавай зоркі” стала фінальным акордам у плеядзе сустрэч, а таксама літаратурных гасцёўняў, прысвечаных да 125-годдзя з дня нараджэння паэта.
– Мы адзначалі юбілей Багдановіча на працягу года. У межах праекта “І вее верш мой дзіўнай казкай…” зладзілі шмат выстаў, конкурсаў, вечарын, сустрэч з пісьменнікамі. Нават вызначылі лепшага знаўцу яго творчасці сярод гарадской моладзі, – распавяла нашаму парталу загадчыца аддзела абслугоўвання і інфармацыі Цэнтральнай раённай бібліятэкі імя Максіма Багдановіча Таццяна Закрэўская. – І прызнаюся, мы былі прыемна здзіўленыя, што моладзь шмат ведае пра Багдановіча.
На вечарыне памяці Максіма Багдановіча
На вечарыне памяці, падрыхтаванай супрацоўнікамі бібліятэкі, вучні сярэдняй школы №12 дэкламавалі вершы паэта, знаёмілі студэнтаў палітэхнічнага каледжа з вядомымі творамі аўтара, узгадвалі асноўныя этапы яго жыцця і творчасці.
Спецыяльна запрошаным госцем мерапрыемства стала загадчыца філіяла музея Багдановіча ў Ракуцёўшчыне Настасся Сярболіна. Яна распавяла пра два месяцы, якія паэт правёў у вёсачцы. Пасля гэты час назавуць самым плённым перыядам у яго творчасці.
Кацярына СУШКО
Фотаздымкі прадастаўленыя Край.бай Таццянай ЗАКРЭЎСКАЙ
Нашли ошибку в тексте? Выделите ее и нажмите Ctrl + Enter
Читайте также
