Глыбачанка Валерыя Рыжая атрымала Гран-пры пленэру-конкурсу «Палітра Пастаўшчыны» (ФОТА)
24-25 кастрычніка з нагоды 35-годдзя мастацкай школы імя А. Ромера ў Паставах адбыўся дзіцячы пленэр-конкурс. Больш за 20 дзяцей з Глыбокага, Шаркаўшчыны, Браслава, Полацка выйшлі ў цэнтр Паставаў, каб увасобіць горад у сваіх творах.
Глыбоцкую дзіцячую мастацкую школу прадстаўлялі Аня Зубко (3 клас), Ліза Жыдко (3 клас), Валера Галавенька (4 клас) і Валерыя Рыжая (5 клас).
Халоднае дажджлівае надвор'е не дазволіла ўвесь час быць на вуліцы, таму большая частка працы адбывалася ў залах Пастаўскага дома рамёстваў. Вечарам другога дня адбыўся святочны канцэрт з нагоды юбілея мастацкай школы, падчас якога журы падвяло вынікі конкурсу.
Аднагалосна журы аддала перамогу вучаніцы пятага класа Глыбоцкай мастацкай школы імя Язэпа Драздовіча Валерыі Рыжай. Аня Зубко, якая вучыцца ў трэцім класе мастацкай школы, атрымала прыз як самая малодшая ўдзельніца пленэру.
Даведка: Альфрэд Ізідор Ромер – беларускі, літоўскі і польскі мастак, скульптар, мастацтвазнаўца і этнограф. Нарадзіўся 16 красавіка 1832 года ў Вільні. Памёр 24 студзеня 1897 года ў маёнтку Каралінава ў Пастаўскім раёне.
ru.wikipedia.org
Юлія ЛАХВІЧ па матэрыялах, прадастаўленых Край.бай Глыбоцкай дзіцячай мастацкай школай імя Язэпа Драздовіча
Фота са старонкі Глыбоцкай дзіцячай мастацкай школы імя Язэпа Драздовіча ў Фэйсбуку
Читайте также
