Новы сезон бясплатных курсаў “Мова нанова” стартаваў у Маладзечне (ФОТА)
Першыя ў 2015 годзе заняткі бясплатных моўных курсаў прайшлі 27 студзеня і былі прысвечаныя тэме “Уваходзіны”. Месцам сустрэчы арганізатары абралі бібліятэку сямейнага чытання “Верасок”.
Пра гэта Край.бай паведаміла загадчыца аддзела абслугоўвання і інфармацыі Маладзечанскай цэнтральнай раённай бібліятэкі імя Максіма Багдановіча Таццяна Закрэўская.
Са слоў спецыяліста, заняткі адбыліся ў межах праекта “Чытаем і размаўляем па-беларуску”. Плануецца, што ён будзе дзейнічаць на працягу двух гадоў.
Як адзначыла Таццяна Закрэўская, сустрэча атрымалася цікавай.
– Вядучыя размаўлялі з удзельнікамі не павучальным тонам, а вялі дыялог. Гучалі жарты, музыка, – дадала яна.
Першую ў гэтым сезоне сустрэчу наведалі каля 20 чалавек. Сярод іх, падкрэсліла суразмоўца, была ў асноўным моладзь.
Падчас заняткаў удзельнікі абмяркоўвалі традыцыі, звычаі і словы, якія звязаны з уваходзінамі. Акрамя таго, журналістка Дар’я Палынская пазнаёміла прысутных з жыццём і дзейнасцю Браніслава Тарашкевіча.
– Шмат хто з прысутных ведаў, что Тарашкевіч жыў у Радашковічах і тое, што ў горадзе ёсць вуліцы, названыя яго іменем, – расказала загадчыца аддзела.
Па інфармацыі Таццяны Закрэўскай, заняткі ў бібліятэцы “Верасок” будуць праходзіць кожны аўторак у 18.00. Тэмы наступных чатырох сустрэч – “Камп’ютары”, “Зоркі”, “Сваякі”, “Гатэль”.
Нагадаем, бясплатныя моўныя курсы пачалі дзейнічаць у Маладзечне яшчэ ў маі 2014 года.
Кацярына СУШКО
Фота Дануты ЗАКРЭЎСКАЙ
Нашли ошибку в тексте? Выделите ее и нажмите Ctrl + Enter
Читайте также
