Як у Маладзечне Каляду сустракалі (фота)
12 студзеня дзверы Дзіцячага Цэнтра культуры “Расток” гасцінна расчыніліся для ўсіх жадаючых даведацца пра цікавыя традыцыі святкавання Каляд на Беларусі.
У зале, абсталяванай як вясковая хата, адбылося фальклорнае свята для жыхароў горада і раёна “Каляду сустракаем – весела гуляем!”, на якое сабралася больш за 80 гледачоў, расказалі kraj.by у ДЦК “Расток”. Сустракала ўсіх Гаспадыня са сваімі сяброўкамі.
Калядная сустрэча распачалася з гаворкі аб традыцыях святочнай вячэры, якая пачынаецца тады, калі на небе запальваецца першая зорка. Да гаспадыні завіталі калядоўшчыкі – спачатку дзеці, а затым і дарослыя. Кожны гурт прыходзіў з сімвалам сонца – Каляднай зоркай. Калядоўшчыкі былі пераапрануты ў традыцыйныя маскі: Мядзведзя – сімвала здароўя і сілы, Пеўніка – сімвала весялосці і радасці, Казы – сімвала багацця і дабрабыту. Песнямі, гульнямі, танцамі яны павесялілі ўсіх прысутных, самым актыўным удзельнікам гульняў падаравалі салодкія сувеніры.
У калядны вечар не абышлося без варожбаў. Цыганка прапанавала гаспадыні, а потым і гледачам даведацца пра лёс і жыццё. З задавальненнем варажылі не толькі дарослыя, але і дзеці.
На заканчэнні свята Гаспадыня пачаставала ўсіх прысутных традыцыйнымі стравамі каляднай вячэры – куццёй, поліўкай і дранікамі.
Kraj.by
Фотаздымкі прадастаўлены kraj.by ДЦК “Расток”
Читайте также
