Віфлеемскі агонь прыбыў у Маладзечна (ФОТА)

Штогод па традыцыі агонь ад нязгаснай лампады, што знаходзіцца ў Віфлееме на Святой зямлі (цяпер у Палесцінскай аўтаноміі, на тэрыторыі Заходняга берага ракі Іардан), разыходзіцца па ўсім свеце. Прыходзіць ён і ў парафіі Маладзечанскага дэканата. З 2005 года гэту місію выконваюць скауты Маладзечанскага аддзялення грамадскай арганізацыі “Хрысціянская садружнасць дарослых і маладых”.

Так адбылося і сёлета напярэдадні свята Божага Нараджэння. Скауты Аўстрыі, Чэхіі, Польшчы данеслі агонь да Гродна, дзе ён быў прыняты ў Фарным касцёле. Далей яго шлях ляжаў праз Валожын да Маладзечна, Мінска і далей на Маскву.

Маладзечанскія скаўты 21 снежня прынялі агонь ад сяброў ХСДМ у Валожыне. Начальнік дружыны скаутаў “Нямецкі Фальварак” Сяргей Шыман і начальнік дружыны “Маладэчна” Валеры Трацяк прывезлі яго ў скауцкую штаб-кватэру ў Маладзечна, дзе ён захоўваўся некалькі дзён у спецыяльным каўчэгу.

У скауцкай штаб-кватэры ў Маладзечне

Начальнік маладзечанскай дружыны скаутаў “Нямецкі Фальварак” Сяргей Шыман прымае агонь ад выканаўчага сакратара Валожынскага аддзялення ХСДМ Уладзіміра Малашкевіча

Першымі святы агонь атрымалі 22 снежня парафіяне касцёла Святога Роха ў Палачанах і парафіі Божага Цела ў Беразінскім. Прыняў агонь ксёндз-пробашч парафій Сяргей Бараўнёў.

Валеры Трацяк (злева) перадае агонь Сяргею Бараўнёву

У палачанскім касцёле

Касцёл Святога Роха ў Палачанах

Касцёл Божага Цела ў Беразінскім

У Маладзечне ў касцёле Святога Юзэфа 23 снежня пад час імшы пробашч парафіі ксёндз-пралат Эдмунд Даўгіловіч-Навіцкі прыняў агонь з рук скаутаў Сямёна Барана, Рамана Ціўновіча i Эдуарда Жалубоўскага. Пробашч расказаў парафіянам пра важнасць гэтай хрысціянскай акцыі, якая будзе доўжыцца ў касцёле на працягу трох дзён, а таксама падзякаваў скаутам.

У касцёле Святога Юзэфа

У гэты ж дзень скауты Эдуард Жалубоўскі і Мікіта Мардасаў перадалі агонь у грэка-каталіцкую парафію Хрыста Чалавекалюбцы. Прыняў яго айцец Алесь Шыбека.

Эдуард Жалубоўскі, айцец Алесь Шыбека і Мікіта Мардасаў

Царква Хрыста Чалавекалюбцы

Для парафіі Святога Казіміра (Чырвонага касцёла) у скауцкім штабе агонь атрымаў 24 снежня брат ордэна Меншых Братоў Капуцынаў Алег Вайцяховіч.

Алег Вайцяховіч у скауцкім штабе

А з касцёлаў парафіяне неслі агонь у свае дамы і кватэры.

“Агонь сагравае і асвятляе душу верніка, прыносіць радасць ад думкі, што ён узяты з месца нараджэння Хрыста. І дазваляе перанесціся думкамі да гэтага светлага месца і ўзрадавацца, падзякаваць Богу за гэту магчымасць дакрануцца да вялікай таямніцы. Кожны, хто браў агонь, так ці інакш дакранаецца да гэтай падзеі”, – адзначыў айцец Сяргей Бараўнёў.

Валеры ТРАЦЯК для Край.бай
Фота прадастаўлена Край.бай Валерыем ТРАЦЯКОМ