У Маладзечне грамадскія актывісты запалілі свечкі ў памяць ахвяраў сталінскіх рэпрэсій (ФОТА)
У Маладзечне ў парку Перамогі 29 кастрычніка ў 18.30 грамадскія актывісты Валянцін Цішко і Ян Лагвіновіч каля валуна-помніка «Пакутнікам за волю і незалежнасць Беларусі» запалілі лампадку і дзве свечкі ў памяць аб прадстаўніках беларускай інтэлігенцыі, растраляных у ноч з 29 на 30 кастрычніка 1937 года.
Грамадскія актывісты Валянцін Цішко і Ян Лагвіновіч запалілі свечкі ля помніка «Пакутнікам за волю і незалежнасць Беларусі» ў Маладзечне
Па загаду Сталіна і Молатава 78 гадоў таму ў Мінску ў турме Народнага камісарыяту ўнутраных спраў (зараз гэта следчы ізалятар Камітэта дзяржаўнай бяспекі) былі растраляны 132 дзеяча культуры і прадстаўніка грамадскасці Беларусі.
Маладзечанец Валянцін Цішко расказаў Край.бай, што прывяло яго ў гэты вечар да помніка «Пакутнікам за волю і незалежнасць Беларусі»:
– Я лічу, што дата расправы сталінскага рэжыму над беларускімі патрыётамі павінна адзначацца на дзяржаўным узроўні. На жаль, гэтага не робіцца. Але забывацца про тое, што адбылося ў 1937 годзе, мы не маем права. Сёння мы запалілі гэтыя свечкі з надзеяй, што хаця б адзін з дзесяці маладзечанцаў, якія пройдуць тут і ўбачаць свечкі, падумае: а чаму яны тут гараць? Задумаўшыся, можа пачне шукаць адказ на гэта пытанне і даведаецца пра трагедыю.
На валуне-помніку пакутнікам за незалежнасць Беларусі гараць свечкі
У Мінску акцыя памяці ахвяраў сталінскіх рэпрэсій прайшла ў гэты ж час каля будынка Камітэта дзяржаўнай бяспекі, паведамляе інфармацыйнае агенцтва БелаПАН. Каля 115 чалавек запалілі свечкі на прыступках будынка КДБ. У 19.25 удзельнікі акцыі разышліся, пакінуўшы запаленыя свечкі.
Сяргей ЗЯНЬКО
Фота аўтара
Читайте также
