Свята песні і паэзіі “Ракуцёўскае лета” у Маладзечанскім раёне адзначаць 28 ліпеня
Паседжанне рабочай групы па падрыхтоўцы свята адбылося сёння, 19 ліпеня, у Маладзечанскім райвыканкаме.
Пра гэта Край.бай паведаміла выконваючая абавязкі дырэктара раённага метадычнага цэнтра народнай творчасці і культурна-асветніцкай работы Анастасія Багушэвіч.
“Сёння ў райвыканкаме адбылося паседжанне, прысвечанае падрыхтоўцы свята, – расказала яна. – Складзены рабочы план правядзення мерапрыемства”.
Свята пачнецца ў Ракуцёўшчыне ў 12.00. Каля Максімавай крынічкі будзе ўсталявана сцэна. Тут адбудуцца выступленні творчых калектываў Маладзечанскага і Мінскага раёнаў, прагучаць вершы беларускіх паэтаў.
“Імёны паэтаў, якія выступяць на сцэне “Ракуцёўскага лета”, стануць вядомыя пасля складання сцэнару свята, які рыхтуюць супрацоўнікі Літаратурнага музея Максіма Багдановіча ў Мінску”, – дадала суразмоўца.
Для ўдзельнікаў мерапрыемства адчыніцца кніжная выстава, якую арганізуе маладзечанская кнігарня “Спадчына”, выстава-продаж сувеніраў і рамесных вырабаў Маладзечанскага раённага цэнтра рамёстваў, будуць працаваць гандлёвыя рады.
“Паседжанне абмеркавала і вырашыла ўсе арганізацыйныя пытанні, у тым ліку і пытанні бяспекі. У час свята будуць дзяжурыць машыны хуткай дапамогі, міліцыя і МНС”, – зазначыла яна.
Плануецца, што свята працягнецца да 16.00.
Вольга НЯЎЗОРАВА
Читайте также
