Стваральніца маладзечанскай школы выцінанкі Вікторыя Чырвонцава памерла 10 кастрычніка
Вікторыя Мікітаўна была адным з заснавальнікаў аддзялення дэкаратыўна-прыкладнога мастацтва ў Маладзечанскім музычным каледжы імя М.-К. Агінскага.
Пра гэта парталу Край.бай расказала старшыня цыклавой камісіі дэкаратыўна-прыкладнога мастацтва каледжа Людміла Валковіч-Борыс.
Вікторыі Чырвонцавай было 77 год. Яна хварэла на анкалогію.
Народны майстар Рэспублікі Беларусь Вікторыя Мікітаўна Чырвонцава на працягу 10 гадоў узначальвала ў каледжы цыклавую камісію дэкаратыўна-прыкладнога мастацтва. Адпаведнае аддзяленне было адкрыта ў 1995 годзе.
Выдатны педагог, чалавек, бязмежна адданы народнаму мастацтву, Вікторыя Мікітаўна адной з першых у Беларусі стала адраджаць амаль забытае старадаўняе мастацтва выцінанкі, піша сайт каледжа імя М.-К. Агінскага. Дзякуючы яе дзейнасці сёння ў краіне добра вядомая маладзечанская школа выцінанкі. Вучні Вікторыі Мікітаўны – Наталля Сухая, Вольга Бабурына, Людміла Валковіч-Борыс, Аксана Ралавец, Ірына Шарак і іншыя – сталі майстрамі, сябрамі Саюза майстроў народнай творчасці Рэспублікі Беларусь.
"Муза і найсвятлейшы чалавек, задужа сціплы, каб ганарыцца сваімі дасягненнямі", – піша пра сваю настаўніцу Наталля Сухая на сваёй старонцы ў Фэйсбуку.
Вікторыю Чырвонцаву пахавалі 12 кастрычніка на могілках у Лазаўцы.
Святлана ЦІШКО
Нашли ошибку в тексте? Выделите ее и нажмите Ctrl + Enter
Читайте также
