Хлебам-соллю сустракалі 3 жніўня на Маладзечаншчыне ўдзельнікаў «Бегу дружбы і міру» (ФОТА)
Самая працяглая ў свеце эстафета стартавала з Лісабона, сталіцы Партугаліі. Агонь дружбы прыйшоў у Беларусь з Літвы.
Як паведамляе “Маладзечанская газета”, на мяжы са Смаргонскім раёнам эстафету прынялі атлеты-аматары Васілій Лябецкі і Уладзімір Крашчанка, якія раніцай 3 жніўня далучыліся да інтэрнацыянальнай каманды. На шляху да самага цэнтра Маладзечна з факелам у руцэ яны ўзначальвалі калону. Партал Край.бай пісаў раней аб тым, што маршрут міжнароднай эстафеты «Бег Дружбы» пройдзе праз Ашмяншчыну, Смаргонь і Маладзечна.
Васілій Лябецкі і Уладзімір Крашчанка ўзначальвалі прабег ад мяжы Смаргонскага і Маладзечанскага раёнаў да Цэнтральнай плошчы горада
У час кароткага перапынку юным спартсменам, школьнікам, усім, хто вітаў гасцей у той дзень, цікава было даведацца пра гісторыю прабегу, маршрут і працягласць. У час размовы ўдзельнікі эстафеты паведамілі, што сёлета прабег мае працягласць па Еўропе больш за 24 тысячы кіламетраў. Адначасова такія эстафеты праходзяць у Азіі, Амерыцы, Афрыцы. У Беларусі атлеты пераадолеюць 750 кіламетраў. Маршрут пройдзе праз Заслаўе, Мінск, Стоўбцы, Нясвіж, Баранавічы, Ліду, Гродна і завершыцца ў Югаславіі, у Бялградзе, 7 кастрычніка.
– Я ўжо трэці раз удзельнічаю ў гэтым прабегу, – расказаў інжынер са Смаленска Міхаіл Радзівонаў. – Спортам займаюся толькі для сябе, каб падтрымліваць добрую фізічную форму. У нашай групе, дарэчы, усе аматары. Мае сябры жывуць у Аўстрыі, Польшчы, Германіі, Венгрыі, Чэхіі, Славакіі, Украіне, Македоніі, многіх іншых краінах. Мы не толькі маем зносіны праз інтэрнэт, але і сустракаемся. Гэты прабег лічу вельмі важным для прапаганды міру і стабільнасці ва ўсім свеце. Хачу нагадаць словы дзевяціразовага алімпійскага чэмпіёна Карла Льюіса: «Несучы факел дружбы, мільёны грамадзян робяць крок да гармоніі, узводзячы мост паміж культурнымі і сацыяльнымі адрозненнямі, якія раздзяляюць свет».
У той жа дзень да прабегу далучыліся юныя маладзечанцы. Наступны прыпынак удзельнікі эстафеты зрабілі на тэрыторыі гісторыка-культурнага комплексу «Лінія Сталіна».
Паводле Маладзечанскай газеты
Читайте также
