ФОТАРЭПАРТАЖ: Лепшых рупліўцаў вёскі ўшаноўвалі на раённым свяце ў Маладзечне

Аб гэтым паведамляе “Маладзечанская газета”. Удзельнікаў свята віталі член Савета Рэспублікі Нацыянальнага сходу Рэспублікі Беларусь Святлана Сарока, дэпутаты Палаты прадстаўнікоў Галіна Лазоўская і Станіслаў Кулеш, старшыня Маладзечанскага райвыканкама Аляксандр Яхнавец.

Першы намеснік старшыні райвыканкама, начальнік упраўлення сельскай гаспадаркі і харчавання Генадзій Бажко адзначыў работу прадпрыемстваў перапрацоўчай прамысловасці – ААТ «Маладзечанскі малочны камбінат», ААТ «Маладзечанскі камбінат хлебапрадуктаў». Таксама ёсць чым ганарыцца і калектывам Маладзечанскага хлебазавода і СТАА «Малінаўшчызненскі спіртагарэлачны завод-«Аквадыў», піша газета.

Прагучалі імёны тых, хто дабіўся сёлета найлепшых вынікаў. Так, на сяўбе лідарамі сталі ААТ «Усход-Агра» (дырэктар Аляксандр Жыгарэнка), ААТ «Палачаны» (Станіслаў Завадскі) і ААТ «Заскавічы» (Аляксей Раманюк). Пераможцамі раённага спаборніцтва на ўборцы збожжавых і зернебабовых былі прызнаны ПСУП «Яхімоўшчына-Агра», якім кіруе Часлаў Бажко, ААТ «Гарадзілава» (дырэктар Андрэй Стадуб) і ПУП «Маркава-Агра» (Леанід Клімовіч). У нарыхтоўцы кармоў у раёне вызначыліся ПУП «Забудова-Агра» (дырэктар Уладзімір Лукша), КСУП «Беразіна-аграпрадукт» (Аркадзій Луновіч) і ААТ «Хоўхлава» (Галіна Нелюб).

Дыпломы, Ганаровыя граматы і каштоўныя падарункі атрымалі лепшыя вадзіцелі, камбайнеры, жывёлаводы, іншыя прадстаўнікі сельскай гаспадаркі і перапрацоўчай прамысловасці – больш за 150 чалавек.

Была таксама падрыхтавана канцэртная праграма.

Паводле “Маладзечанскай газеты”
ФОТА Міхаіла МАРЖЭЎСКАГА, Кraj.by