Выстава мастака Чэслава Жуселя пачала працаваць у Браславе (ФОТА)
У Музеі традыцыйнай культуры ў Браславе адчынілася выстава карцін мясцовага мастака Чэслава Жуселя, які працуе ў манеры інсітнага мастацтва (прымітывізму). Выстава будзе працаваць на працягу аднаго месяца.
Экспазіцыя была прадстаўлена паўсотняй прац, паведамляе westki.info.
Аўтар піша сюжэтныя кампазіцыі, прысвечаныя вясковаму побыту, народным святам. Мастака натхняюць уласныя ўспаміны, таму шмат прац прысвечана дзяцінству аўтара.
Імпрэза распачалася беларускімі спевамі
Неаднаразова мастак быў удзельнікам выстаў інсітнага мастацтва, якія адбываліся ў Віцебску. Браў удзел у Маскоўскім міжнародным фестывалі наіўнага мастацтва і творчасці аўтсайдэраў у 2010 годзе.
Мастак распавядае аб сваім жыцці
Чэслаў Жусель нарадзіўся ў 1948 годзе на Браслаўшчыне ў вёсцы Пяткунішкі. Як прызнаецца сам мастак, скончыў ён “ажно чатыры школы” (пачатковую, базавую і сярэднюю), у Відзах скончыў вучылішча. Любіў маляваць з ранняга дзяцінства. Трымцела заўсёды ў душы: хацеў фарбы. Аднойчы таемна ад бацькоў збег у мястэчка Опсу за акварэльнымі фарбамі. Так мастак упершыню пачаў маляваць. Пазней была армія, там было не да малявання. Калі ўжо Чэслаў Язэпавіч працаваў на будаўніцтве ў Маладзечне, фарбы набыў, але іх хутка скралі.
Як кажа сам Чэслаў Язэпавіч, сур’ёзна ўзяўся за маляванне, калі стала стаў жыць у Браславе. Атрымоўвалася ўсё лепш і лепш.
Некалі ў Браславе каля кінатэатра была кніжная крама, дзе мастак набыў кніжку “Второе призвание”, прачытаў і вырашыў, што варта паступіць у Маскву ў Завочны народны універсітет мастацтваў. Гэта было ў 1985 годзе. Курс каштаваў 40 рублёў. Скончыў вучобу ў 1991 г., аддзяленне “Выяўленчае мастацтва”.
Чэслаў Жусель тлумачыць сюжэты сваіх прац
"Здымак на памяць". (Чэслаў Жусель у дзяцінстве разам са сваёй маці)
"Аўтапартрэт"
Паводле westki.info
Читайте также
