Выстаўка “Саломкі залатой зачараванне” адкрыецца ў Маладзечне 11 красавіка
Адкрыццё выстаўкі майстра саломапляцення Людмілы Валковіч-Борыс адбудзецца ў фае дзіцячай мастацкай школы ў 17.00.
Аб гэтым Край.бай паведамілі ў Маладзечанскай дзіцячай мастацкай школе.
Даведка. Людміла Валковіч-Борыс скончыла СШ №5 г. Маладзечна. Адначасова вучылася ў дзіцячай мастацкай школе, якую скончыла ў 1991 г. Удзельнічала ў гарадскіх і абласных конкурсах “Юныя таленты” у 1987-1989 гг. Узнагароджана граматамі гарадскіх і абласных аддзелаў культуры і народнай адукацыі.
Людміла Валковіч-Борыс
У 1993 г. была прынята ў Беларускі саюз майстроў народнай творчасці. У 1997 г. скончыла вучобу ў Маладзечанскім музычным вучылішчы імя М.-К. Агінскага па спецыяльнасці “Дэкаратыўна-прыкладное мастацтва”. Атрымала кваліфікацыю выкладчыка, мастака, майстра і паступіла на завочнае аддзяленне Беларускага ўніверсітэта культуры і мастацтва на факультэт “Народныя рамёствы”, які скончыла ў 1999 г.
Першапачаткова працавала ў аб’яднанні “Купалінка” майстрам па інкрустацыі і пляценні з саломкі. Потым з 1995 г. працавала выкладчыкам дэкаратыўна-прыкладнога мастацтва ў ДМШ г. Маладзечна. За час працы ў ДМШ была неаднаразова ўзнагароджана ганаровымі граматамі аддзела культуры Маладзечанскага гарвыканкама за актыўны ўдзел у рабоце па выхаванні падрастаючага пакалення і развіцці народнага дэкаратыўна-прыкладнога мастацтва.
У 2003 г. была ўзнагароджана дыпломам гарвыканкама ў намінацыі “Народны майстар года” г. Маладзечна.
3 2003 г. працуе выкладчыцай на аддзяленні ДПМ УА “Маладзечанскі дзяржаўны музычны каледж імя М.-К. Агінскага”. У 2006 г. была прызначана загадчыцай гэтага аддзялення.
Людміле Валковіч-Борыс давялося вучыцца ў такіх вядомых і таленавітых мастакоў Маладзечна, як Рыгор Мяжуеў, Юрый Герасіменка-Жызнеўскі, Васіль Таркан, Васіль Лазоўскі, Генадзь Селядзец, Маіна Талпыга, Сямён Кісель.
А веды і любоў да дэкаратыўна-прыкладнога мастацтва пераняла ад выдатнага і таленавітага настаўніка і народнага майстра дэкаратыўна-прыкладнога мастацтва Беларусі Вікторыі Чырвонцавай.
Людміла Валковіч-Борыс шмат удзельнічае ў гарадскіх, абласных і рэспубліканскіх конкурсах і выставах. Яе работы атрымліваюць высокую ацэнку журы конкурсаў і адзначаюцца граматамі і дыпломамі.
Фота і інфармацыя прадастаўлены Край.бай дзіцячай мастацкай школай Маладзечна
Читайте также
