У Вязынцы Маладзечанскага раёна 1 кастрычніка адсвяткавалі Багач (фота)

У народным календары Багач прымеркаваны да заканчэння цыкла вырошчвання ўраджаю, а таксама першага запальвання хатняга агменю – васковай свечкі ў лубцы з жытам, якую ставяць на покуць і захоўваюць там на працягу ўсяго года, што прыносіць у дом багацце і шчасце.

Свята ў Вязынцы пачалося з таго, што фальклорныя гурты «Рутвіца», «Гарынь», «Мярэжа», «Дайнова» і іншыя выканалі шэраг жніўных, дажыначных і восеньскіх песень.

Пасля гэтага гаспадар святкавання пажадаў усім, хто захацеў насыпаць зерня ў лубец, каб Багач дапамагаў у штодзённых справах. Затым запалілі свечку-Багач, а дзяўчаты сталі частаваць гасцей свята хлебам і мёдам.

Танцоры клуба традыцыйнага танца «Сіта» зладзілі танцавальную вечарынку.

Падчас свята працавала і дзіцячая пляцоўка: дзеці маглі пакачацца ў сене, пагушкацца на саламяным козліку, зрабіць каралі і вянкі з восеньскага лісця і ягад. У дадатак да гэтага дзеці гулялі ў рухомыя гульні, такія як «Верабей» і іншыя.

Як заўжды, працавалі традыцыйная кухня і кірмаш.

Імгненні свята на фотаздымках Край.бай.

Марына ЖАКАЎКА
Фота аўтара