Трэцякласніца з Маладзечна выдала зборнік казак і апавяданняў
Вучаніца трэцяга класа Маладзечанскай гімназіі №10 Каця Ляшчынская выдала першы зборнік казак і апавяданняў «Мая маленькая радзіма».
Кніжачка маленькая – кішэннага фармату, у ёй 22 старонкі. Накладам у паўсотні асобнікаў, яна выйшла ў выдавецтве Аляксея Вараксіна ў Мінску. У ёй – казачкі і апавяданні Каці, аздобленыя малюнкамі яе сяброўкі і аднакласніцы, піша 10 снежня сайт «Маладзечанскай газеты».
Гэты мілы дзіцячы праект дапамаглі ажыццявіць бацькі дзяўчынак Алеся і Сяргей Ляшчынскія, а таксама Алена і Алег Аляксеевы.
– У сем гадоў дачка прачытала кнігу Івана Сакалова-Мікітава «Ад вясны да вясны», і ёй вельмі спадабалася, як аўтар апісвае прыроду. З той пары куды б мы сям’ёй ні ехалі – на рэчку, у лес, яна бярэ з сабой блакноцік з ручкай і запісвае назіранні, – расказвае мама Кацюшы Алеся.
Калі такіх запісаў сабралася шмат, Каця перапісала іх у самаробную кніжачку: склала лісты фармату А4 папалам, а мама іх прашыла. Калі самапісных кніжак стала некалькі, мама вырашыла лепшыя творы набраць на камп’ютары, а неўзабаве звярнулася ў выдавецтва.
Каця папрасіла сяброўку Карыну Аляксееву, якая захапляецца маляваннем, стварыць вокладку і сюжэты некаторых твораў.
Паводле «Маладзечанскай газеты»
Фота з сайта «Маладзечанскай газеты»
Нашли ошибку в тексте? Выделите ее и нажмите Ctrl + Enter
Читайте также
