“Там, дзе Уша серабрыцца”. Паэтычная пляцоўка пад такой назвай працавала падчас Дня горада ў Маладзечне

Менавіта пад такой назвай не так даўно пабачыла свет кніга, дзе пад адной вокладкай сабраныя паэтычныя, празаічныя і публіцыстычныя творы пісьменнікаў, дзейнасць і жыццё якіх непасрэдна звязаныя з Маладзечанскім краем. На свяце былі перагорнутыя некаторыя паэтычныя старонкі гэтага зборніка.

Са сваімі паэтычнымі творамі гледачоў знаёмілі Людка Сільнова, Тамара Бярэзіна, Лявон Цімохін і Валерый Хіхіч. Імпрэзу вяла паэтка Таццяна Атрошанка, якая акрамя кніг мае свой аўтарскі кампакт-дыск, з якога і прагучала песня ў яе выкананні. У праграме таксама бралі ўдзел барды Сяргей Томкавіч і Юрый Бялоў. Цудоўныя беларускія песні выконвалі таксама Хрысціна Лоўчая і Вольга Зяновіч.

Таццяна Атрошанка

Лявон Цімохін

Слухачы

Фота на памяць

Супрацоўнікамі ДУК “Маладзечанская цэнтральная раённая бібліятэка імя Максіма Багдановіча” былі арганізаваныя кніжная выстава “Я тут бачу свой край” і буккросінг.

Кніжная выстава

Дана ЗАКРЭЎСКАЯ
Фота аўтара

Даведка Край.бай. Буккросінг (ад англ.: bookcrossing) вызначаецца як "практыка пакідання кнігі ў публічным месцы, каб яе ўзялі і пачыталі іншыя, якія затым зробяць таксама". Тэрмін паходзіць з bookcrossing.com- свабоднага кніжнага анлайн-клубу, які быў заснаваны падтрымаць практыку з мэтай "зрабіць увесь свет бібліятэкай".