Стала вядома, хто прадставіць Міншчыну на конкурсе маладых выканаўцаў фестывалю «Маладзечна-2015» (ФОТА)
У Палацы культуры адбыўся абласны адборачны тур, па выніках якога стала вядома, хто прадставіць Мінскую вобласць на конкурсе маладых выканаўцаў ХV Нацыянальнага фестывалю беларускай песні і паэзіі «Маладзечна-2015».
Імі сталі маладзечанец Марк Войтка, Таццяна Валахановіч з Дзяржынскага раёна і Кацярына Лазука са Старадарожчыны, піша 24 лютага сайт газеты «Маладзечанская газета».
Сярод 12 удзельнікаў маладзечанцаў было пяцёра: выхаванкі ўзорнай студыі эстрадных спеваў «Жывы гук» Палаца культуры, трэцякурсніца музычнага каледжа імя М.-К. Агінскага Вера Лявіцкая, дзесяцікласніца гімназіі-каледжа мастацтваў Дзіяна Бажко, Аляксандра Шаюк, якая вучыцца ў гімназіі №7 (прадстаўляла Дзіцячы Цэнтр культуры «Расток», рэжысёр Радашковіцкага цэнтра культуры Паліна Захарчанка. Адным з самых моцных канкурэнтаў удзельнікі адборачнага тура называлі маладзечанца Марка Войтку.
Удзельнікі адбору ад Маладзечна: Вера Лявіцкая, Марк Войтка, Дзіяна Бажко, Аляксандра Шаюк, Паліна Захарчанка
Марк Войтка летась ужо спрабаваў свае сілы на конкурсе. Раней ён займаўся ва ўзорнай студыі эстрадных спеваў «Брава!» Дзіцячага Цэнтра культуры «Расток», а цяпер вучыцца ў Мінску ў ВНУ.
Таццяна Валахановіч з Дзяржынскага раёна – кіраўнік эстраднай студыі «Галасы» Дома культуры пасёлка Энергетыкаў. Гэта першы яе сур’ёзны сцэнічны вопыт.
Кацярына Лазука са Старадарожчыны выступіць на фестывалі беларускай песні і паэзіі ў другі раз.
Паводле сайта газеты «Маладзечанская газета»
Фота з сайта газеты «Маладзечанская газета»
Читайте также
