Прэзентацыя кнігі “На “панскіх” могілках Плябані” адбудзецца ў Маладзечанскім раёне 27 ліпеня
Выданне пабачыла свет у гэтым годзе ў межах новай кніжнай серыі “Гістарычныя могілкі Беларусі”. Прэзентацыя адбудзецца ў Мастацкай галерэі ў Плябані.
Пра гэта паведамляе сайт Дзяржаўнага літаратурнага музея Янкі Купалы. Метадыст Мастацкай галерэі Плябані Юры Русак пацвердзіў Край.бай гэтую інфармацыю.
Кніга “На “панскіх” могілках Плябані” – першае выданне ў Беларусі, якое, акрамя вуснай гісторыі, апісання культавай архітэктуры, рэдкіх старых фотаздымкаў, утрымоўвае грунтоўнае даследванне “панскіх” могілак Плябані праз прызму гісторыі, краязнаўства, мастацтвазнаўства, геалогіі і нават некрапалістыкі, якая толькі развіваецца ў нашай краіне.
У кнізе сабраныя:
- падрабязная мапа могілак, на якой пазначана каля 600 надмагілляў,
- каталог надмагілляў, якія захаваліся, з іх дэтальным апісаннем,
- фотаздымкі найбольш характэрных надмагілляў,
- пералік і тлумачэнне могілкавых сімвалаў, прыклады эпітафій,
- вызначэнне пагрозаў, якія існуюць для захавання некропаля.
Матэрыялы, размешчаныя ў кнізе, дазволяць любому, хто пажадае, правесці падобныя працы на гістарычных могілках свайго рэгіёна.
Укладальніца кнігі Вольга Сямашка распавядае: “Кніга прысвечаная памяці Міхася Чарняўскага, Міхася Раманюка і Сержука Вітушкі – асобаў, якія ў свой час спрычыніліся да даследвання плябанскіх могілак і магілы паўстанцаў Каліноўскага, якая на іх і знаходзіцца. Выданне кнігі стала вынікам палявых даследаванняў могілак Плябані і самой вёскі ў перыяд з 2007-га па 2013 год высілкамі нашай ініцыятывы прыборкі і пашпартызацыі гістарычных могілак Беларусі. У нас атрымаўся даведнік, які дазволіць чытачу зазірнуць у невядомыя старонкі гісторыі Плябані ХIХ-XX стагоддзяў, павандраваць па саміх могілках для азнаямлення з гэтым спецыфічным месцам памяці і пашукаць памерлых сваякоў, аддаць даніну памерлым”.
Акрамя гэтага, наведвальнікі прэзентацыі даведаюцца:
- Чаму можна лічыць, што Каліноўскі перапахаваны ў Плябані?
- Чаму з магілы паўстанцаў Каліноўскага ў Плябані на працягу стагоддзя тройчы знікала шыльда і дзе схаванае першапачатковае надмагілле?
- Дзе пахаваны мужчына-прататып пана Быкоўскага з п’есы Купалы “Паўлінка”?
- Чаму Плябань стала месцам паломніцтва папскага нунцыя?
У час прэзентацыі запланаваныя выступленні бардаў Таццяны Беланогай, Андрэя Касценя, музыкі Віктара Сямашкі і іншых.
Імпрэза пачнецца ў Мастацкай галерэі Плябані ў 12.30. Уваход вольны.
Прэзентацыя кнігі “На “панскіх” могілках Плябані” адбудзецца таксама ў Мінску сёння, 25 ліпеня, у музеі Янкі Купалы.
Па матэрыялах kupala-museum.by
Читайте также
