Пра сусветна вядомых бібліятэкараў расказвалі ў маладзечанскай бібліятэцы (ФОТА)
У снежні 2015 года спаўняецца 70 гадоў Маладзечанскай цэнтральнай раённай бібліятэкі імя М. Багдановіча. На працягу года праходзілі мерапрыемствы, прысвечаныя гэтай даце. Адно з іх адбылося ў дзяцячым аддзеле бібліятэкі 25 лістапада.
Яно было прысвечана прафесіі бібліятэкара.
Супрацоўніца аддзела Наталля Меднікава пазнаёміла дзесяцікласнікаў СШ №11 з гісторыяй стварэння бібліятэкі ў Маладзечне, паказала значнасць і неабходнасць “кніжных людзей”, абвергла міфы аб прафесіі бібліятэкара. Напрыклад, што гэта прафесія ўчарашняга дня і ў бібліятэцы – толькі кнігі і пыл. У сучасных бібліятэках, у тым ліку ў маладзечанскай, цяпер ёсць электронныя каталогі, літаратура на электронных носьбітах, для чытачоў ладзяць сустрэчы па інтарэсах, творчыя майстар-класы, дні культуры розных краін.
Яшчэ адзін міф – што бібліятэкары сумныя, нудныя людзі. Падчас мерапрыемства можна было даведацца, хто са знакамітых людзей прадстаўляў гэтую прафесію. А гэта, напрыклад, пісьменнікі Ёган Вольфганг Гётэ, Іван Крылоў.
Маладыя людзі даведаліся, што прафесію бібліятэкара можна атрымаць у Беларускім дзяржаўным інстытуце культуры і мастацтва. На завяршэнне атрымалі буклеты пра універсітэт з інфармацыяй пра факультэты і спецыяльнасці, па якіх у ім рыхтуюць.
Наталля МЕДНІКАВА
Фота аўтара
Читайте также
