На вясковым Купаллі ў Маладзечанскім раёне вадзілі карагоды і танчылі ойру (фота)
6 ліпеня ўдзельнікі этнаграфічнага клуба “KOLA” з Маладзечна і народнага ансамбля “Крынічанька” пры Цэнтралізаванай клубнай сістэме Маладзечанскага раёна зладзілі сваё аўтэнтычнае Купалле. Музыкі наведалі вёску Раёўшчына, дзе пад гукі дуды і фальклорныя песні вадзілі купальскія карагоды.
Чаму маладзечанцы вырашылі “збегчы” на Купалле ў вёску, Край.бай распавяла ўдзельніца этнаграфічнага клуба Вольга Трубач.
– З ансамблем “Крынічанька” мы разам вучылі аўтэнтычныя фальклорныя песні. І жанчыны вельмі хацелі падзяліцца з намі сваім досведам. Таму, калі нас пазвалі на свята ў Раёўшчыну, адразу адгукнуліся. Такое Купалле мне падаецца больш сакральным, сапраўдным, чым тое, што адбываецца ў горадзе, – падзялілася суразмоўца.
Па словах Вольгі Трубач, традыцыйных спускаў вяночкаў на ваду не было. Затое было шмат танцаў і песень. У канцы вёскі каля імправізаванага вогнішча ўдзельнікі свята вадзілі карагоды, танцавалі лявоніху, падыспань, ойру. Музычныя кампазіцыі выконваў сапраўдны дудар Міхась Русакевіч.
На свята таксама сабраліся мясцовыя жыхары: жанчыны прыйшлі ў вяночках, дзеці танчылі разам з дарослымі.
– Вяскоўцы чамусьці саромеліся ўдзельнічаць, асабліва мужчыны. Самымі актыўнымі, напэўна, былі дзеткі, – зазначыла Вольга Трубач.
Кацярына СУШКО
Фота з сайта суполкі Этнаграфiчны клуб "KOLA" УКантакце
Читайте также
