Маладзечанскія музыканты паказалі ў Брэсце оперу «Міхал Клеафас Агінскі. Невядомы партрэт» (ФОТА)
Канцэрт праходзіў у рамках ХХVІІ фестывалю класічнай музыкі «Студзеньскія музычныя вечары». Паўнавартасную оперную пастаноўку жыхары Брэста ўпершыню ўбачылі менавіта ў выкананні маладзечанцаў.
Калектывы Маладзечанскага маладзёжнага музычнага народнага тэатра і сімфанічнага аркестра Маладзечанскага музычнага каледжа імя М.-К. Агінскага ў Брэсце паказалі оперу «Міхал Клеафас Агінскі. Невядомы партрэт», створаную да 250-годдзя з дня кампазітара, піша 20 студзеня сайт «Маладзечанскай газеты».
Маладзечанцы на фестывалі выступалі двойчы – 10 студзеня яны паказалі оперу, а назаўтра сімфанічны аркестр выканаў творы нашага земляка-беларуса, а цяпер піцерскага кампазітара Леаніда Левашкевіча. У суправаджэнні аркестра выступілі таксама вядомыя салісты Андрэй Саўчанка і Валянцін Сухадолец.
У Маладзечне прэм’ера оперы кампазітара Алега Залётнева «Міхал Клеафас Агінскі. Невядомы партрэт» адбылася 12 снежня 2013 года. Мастацкі кіраўнік праекта – Рыгор Сарока, аўтар лібрэта і рэжысёр выступае Сяргей Макарэй.
– Акрамя выдатнага выканання аматары класічнай музыкі адзначылі тое, што опера напісана на беларускім гістарычным матэрыяле і выконваецца на роднай мове, – паведаміў Рыгор Сарока. – Жыхары і госці Брэста ўпершыню ўбачылі поўнафарматную пастаноўку з вялікім сімфанічным аркестрам, салістамі і хорам, танцавальнымі сцэнамі, у якіх вельмі добра паказала сябе моладзь.
Паводле сайта «Маладзечанскай газеты»
Фота з сайта «Маладзечанскай газеты»
Читайте также
